Dapli il 2015 èn las sis vischnancas da Sent, Scuol, Ardez, Tarasp, Guarda e Ftan fusiunadas sut il num Scuol. Las discussiuns d’avant questa fusiun sa muventavan dad ina vart enturn la perdita d'autonomia, sco per exempel a Sent. U era enturn motivs pli profans sco la dumonda tgi che duess pulir ils bundant 100 bigls en la vischnanca. A Scuol vegnivan quels pulids da lavurants e lavurantas communalas, en las autras tschintg vischnancas era quai però la lezia dals vischins.
La dumonda da finanzas
Avant la fusiun, eran las vischnancas enturn Scuol posiziunadas meglier finanzialmain. E la dumonda era schebain Scuol sez profitass suenter la fusiun dals meds da las autras vischnancas per pajar ils debits communals.
La votaziun
Cun sairadas d’infurmaziun ed era cun ina communicaziun averta, han tut ils responsabels e las responsablas da las sis vischnancas pudì persvader lur abitants ed abitantas dal project. Ils resultads da la votaziun han mussà quai: Guarda ha ditg Gea cun 93%, Scuol cun 87%, Ftan cun 82%, Ardez cun 76%, Sent ch'era la vischnanca cun la pli visibla opposiziun, cun 72% e Tarasp cun il pli «nausch» resultat cun 59% da las vuschs. Uschia è la fusiun vegnida acceptada da la populaziun.
10 onns pli tard
Per quest giubileum avain nus dumandà differentas persunas da las fracziuns da la vischnanca da Scuol per lur opiniun davart 10 onns fusiun. Suenter avain nus purtà questas opiniuns a las instanzas politicas da la vischnanca.
La cuntentezza è qua, ma raubas pitschnas en seccantas
Cun discurrer cun la glieud en tut las fracziuns da Scuol, è quella pulit satisfatga da la fusiun. Per l’ina u l’autra èn pitschnas raubas seccantas, sco per exempel la rumida da naiv, u era la perdita dal contact persunal cun ils lavurants e las lavurantas communalas. Ma era auters champs da lavur per la vischnanca ha nossa retschertga manà a la glisch. Las differentas leschas da fabrica ch'èn differentas en mintga fracziun. Ma era l'administraziun da las vias da guaud, nua ch'i valan differentas reglas da fracziun a fracziun èn be in pèr exempels. In auter tema da discussiun era però la mancanza d’interess da la populaziun a las radunanzas communalas e la dumonda co motivar daplirs votants e lvotantas da sa participar.
Ma prendì tut ensemen, ha la fusiun purtà dapli midadas positivas che negativas a las abitantas ed ils abitants.
Reacziuns da la presidenta communala
Suenter avair ramassà las opiniuns da la populaziun, avain nus pudì star a plaz cun la presidenta communala da Scuol Aita Zanetti. Ella ha reagì sin las las respostas da vischinas e vischins:
Las aspectativas èn sa midadas ils ultims onns. Jau crai che la vischnanca da Scuol duai adina resguardar e tractar sumegliant las fracziuns. E sche ils servetschs èn vegnids megliers, sche fa quai plaschair.
Or da l'archiv