Suenter la fusiun da Tschiertschen cun Cuira sin l'entschatta da quest onn ha il chantun Grischun exact 100 vischnancas. Schebain che la finamira dal chantun è stada da vegnir fin il 2020 sin sut 100 vischnancas , sajan els cuntents d’avair cuntanschì questa finamira er cun tschintg onns retard, ha ditg Simon Theus da l’Uffizi per vischnancas envers il schurnal regiunal da SRF. Il chantun saja sin curs quai che pertutgia sia strategia. A lunga vista è la finamira da vegnir sin sut 50 vischnancas. Tge che «a lunga vista» munta concret lascha il chantun avert, perquai che las vischnancas decidan sezzas sch'ellas vulan fusiunar u betg. Ils ultims 25 onns ha il chantun laschà custar quella strategia stgars 200 milliuns francs sco contribuziuns da promoziun. Raps bain investids, di Simon Theus.
Svilup positiv
Che fusiuns da vischnancas sajan in success mussa er in rapport da la scola auta spezialisada dal Grischun FHGR da l'onn 2023 ch'ha prendì sut la marella fusiuns. Il facit: Las vischnancas fusiunadas hajan in fundament finanzial solid, sajan davantadas pli attractivas sco lieu e las administraziuns sajan vegnidas pli professiunalas.
Raschun per ina fusiun pon esser motivs economics, ma oravant tut strategics.
Aifer ils ultims 10 onns han pliras valladas sco per exempel Scuol, Alvra, Arosa, Glion u Lumnezia fusiunà tar ina gronda vischnanca. Tenor Simon Theus da l'Uffizi per vischnancas saja la dinamica uss in'autra. Ils proxims onns pudessia plitost dar vischnancas pli pitschnas che sa collian cun ina vischnanca pli gronda, sco tar l'exempel Tschiertschen cun Cuira . Guardà anc in zic pli enavant pudessi dentant era puspè dar dapli fusiuns pli grondas – quai en territoris economicamain ferms sco per exempel la Val dal Rain Grischuna. Tge vischnancas dal chantun che vegnan a fusiunar sco proxim n'è anc betg cler. I dettia dentant differentas fusiuns che vegnian discutadas ed instradadas.
