La giuvna vischnanca fusiunada Muntogna da Schons ha passentà in onn cun blera lavur – ma tut haja funcziunà bain cun l'engaschament da ses collegas da suprastanza. Uschia ha Marco Dolf resumà sia bilantscha da l'emprim onn da la nova vischnanca.
Uss spetga tranter auter il model directiv dal territori communal. La populaziun da las fracziuns da Donat, Casti-Vargistagn, Lon, Maton e Pazen/Farden ha inoltrà ils giavischs e las remartgas areguard il sboz. Ussa è la suprastanza vi da terminar quest model, ch'è la basa per in svilup da la vischnanca.
La lavur cumenza uss
Cun il model directiv dal territori communal va Marco Dolf da princip d'accord. Sulettamain la prognosa negativa dal dumber d'abitants e d'abitantas disturba il president communal. La fin finala decida il dumber da la populaziun, quantas zonas e quantas parcellas da construcziun che la vischnanca ha a disposiziun.
In model directiv è individual
Il planisader dal territori Dominik Rüegg ha accumpagnà diversas vischnancas en il process ad in model directiv dal territori communal. In model directiv saja adina ina schanza per ina vischnanca da scuvrir il potenzial – il medem mument saja il model dentant er la basa per ina vischnanca da definir schanzas, spezialmain per vischnancas fusiunadas.
In tema procuria adina per gronda discussiun, las zonas da construcziun. In model directiv na saja dentant betg ina planisaziun locala en detagl, uschia Rüegg.