L'iniziativa da vulair fusiunar stoppia vegnir da las vischnancas sezzas e betg dal chantun, di Martin Bühler. L'Uffizi per vischnancas cusseglia e sustegnia quellas che sa decidian da far quest pass, ma cumandar, gliez na fetschian els betg. Quai hajan la regenza grischuna ed il cussegl grond decis uschia.
Tuttina, Martin Bühler animescha las vischnancas da guardar sin las atgnas structuras. Quai vul dir, avain nus avunda persunas qualifitgadas per ils uffizis communals ed èn las finanzas er anc en 10-20 onns bunas? Insatge saja numnadamain cler:
Sch'ins è lura ina giada en pitgiras, lura vul nagin pli fusiunar cun ins. Perquai èsi d'avantatg che las vischnancas guardan era en il futur.
Plinavant possia era dar eveniments nunspetgads che pretendian ina vischnanca ferma, sco quai che l'exempel da la bova da crappa a Bondo en Bregaglia mussa:
Sche la vischnanca da Bondo fiss stada persula avess ella gì enormas miserias da tegnair quint a las sfidas da lez temp.
La vischnanca fusiunada Bregaglia dentant saja gia oravant s'engaschada per las construcziuns da protecziun. Uschia haja la vischnanca fusiunada pudì far frunt a las sfidas.
Las varts positivas domineschan
Da l'autra vart chapeschia el dentant era ch'ina fusiun possia svegliar emoziuns, per exempel la tema da betg pli pudair s'identifitgar cun la vischnanca e plinavant stoppian ins communitgar dapli in cun l'auter. Tut quai possia esser ina gronda sfida. Dentant las varts positivas domineschan, tenor el. El saja pertschert ch'ins vegnia da cuntanscher bler sch'ins repartia la responsabladad ed ils burdis sin pliras spatlas. Vul era dir ch'ins chattia en ina gronda vischnancas probabel dapli persunas cumpetentas per uffizis communals. In factur che procura en il meglier cas per ina vischnanca pli ferma ed independenta.