Il plan da la citad da Cuira da bajegiar ina segunda roda da vent «Oldis II» a Haldenstein, en il territori Oldis, ha fatg in pass enavant. Suenter ch'il parlament aveva approvà la revisiun parziala cun 16 encunter 4 vuschs, han ils 9 da favrer uss era ils votantas ed ils votants da Cuira dà glisch verda. Grazia al Gea dad 83,1% dal suveran po la citad da Cuira crear la basa giuridica en la planisaziun per pudair bajegiar ina segunda ovra d'energia da vent en l'areal Oldis. En tut 38,6% da la populaziun da Cuira ha purtà lur vusch a l'urna.
Midadas èn previdas en la lescha da bajegiar a Haldenstein, en il plan da zonas ed en il plan general da furmaziun. Avant che propi pudair bajegiar la segunda roda da vent dovri dentant l'emprim anc la lubientscha per bajegiar ordaifer la zona da bajegiar. Il project è part da la strategia d'energia 2050 da la citad Cuira.
«Oldis II» porta dapli effizienza
Dapi il 2013 exista gia l'emprima roda da vent da l'interpresa Calandawind SA «Oldis I» a Haldenstein. Quella generescha bun 4,5 uras gigawatt ad onn – avunda energia regenerabla per radund 1'300 chasadas. Uss vul la Calandawind SA cun sedia a Cuira construir ina segunda roda da vent – la «Oldis II» – datiers da l'existenta. Las cundiziuns da vent sajan bunas là ed ils conflicts areguard la natira sajan mo pitschens en il territori Oldis, scriva la citad da Cuira. Plinavant saja l'acceptanza envers implants d'energia da vent a Haldenstein s'augmentada, dapi ch'ins haja installà l'emprima roda da vent il 2013. Quai mussa tenor la citad da Cuira in studi da l'universitad da Son Gagl. Grazia a novas tecnologias fiss la segunda roda da vent bunamain dubel uschè effizienta sco la «Oldis I». Cun 7,5 uras gigawatt ad onn producess ella schizunt avunda energia per 2'200 chasadas.
Or da l'archiv: