Val Müstair
En la vischnanca da Val Müstair n'ha nagin candidat cuntanschì ina maioritad absoluta d'almain 362 vuschs. A la presidenta en uffizi – Gabriella Binkert Becchetti – ha mancà mo ina vusch per cuntanscher la maioritad absoluta. Il cumbat per il post dal presidi va pia en in segund scrutini ch'ha lieu ils 13 d'october tranter Gabriella Binkert Becchetti e Thomas Schadegg. Ivo Lamprecht ha annunzià ch'el na candidescha betg pli en quest segund scrutini.
Trais candidats han cumbattì per il post dal presidi communal a Val Müstair: Gabriella Binkert Becchetti ha cumbatì per sia reelecziun cunter Ivo Lamprecht e Thomas Schadegg che fan part da la suprastanza.
Flem
Christoph Schmidt è il nov president communal. El ha fatg la cursa cun 546 vuschs avant Nicola Fantini (senza partida) cun 411 vuschs. La maioritad absoluta è stada tar 513 vuschs.
Il suveran ha plinavant approvà cun ina clera maioritad da 1'002 vuschs Gea cunter 145 vuschs Na la modernisaziun da l'infrastructura dal center da sport «Prau la Selva». El duai daventar ina part integrala da la vita communala e porscher dapli activitads da temp liber per tuttas vegliadetgnas e tut'aura. Era l'entira purschida da sport da glatsch duai da nov sa chattar en il nov center da sport. Il project custa a la vischnanca 20 milliuns francs.
Era la revisiun parziala da la planisaziun locala «Campadi Prau la Selva» han ils e las da Flem acceptà cleramain cun 1'023 vuschs persuenter e 121 vuschs encunter. La vischnanca vul reorganisar il campadi e separar cleramain l'utilisaziun dal territori tranter zona da campadi e zona da guaud. Quai duai evitar conflicts d'utilisaziun.
Approvà cun resultat sumegliant ha la populaziun da Flem era la revisiun parziala da la planisaziun locala «Stenna» (1'024 vuschs Gea cunter 123 vuschs Na): Sco mesira cunter la mancanza da spazi d'abitar per persunal vegnan las cundiziuns adattadas, per ch'igl è pussaivel da crear abitaziuns da persunal sut la punt da «Stenna». Finanzià vegn quest project d'in investur e betg da la vischnanca.
Trimmis
Nicola Stocker daventa nov president communal da Trimmis – quai cun 782 vuschs dals 1'072 cedels valaivels. Cun quai resultat ha Nicola Stocker cuntanschì cleramain la maioritad absoluta da 537 vuschs. El era dapi il matg gia en l'uffizi da vicepresident communal ed ha cumbattì per il presidi cunter Crispin Joos.
A Trimmis è ultra da quai l'entira suprastanza vegnida remplazzada. Part da la suprastanza communala fan: Cilia Rohner-Malär, Norbert Schmucki, Reno Brot ed Jürgen Seeliger.
Cuira
Il barat da parcellas tranter la citad da Cuira e la «Societad da construcziun City West» fa naufragi. Quai cun bun 63% Na cunter stgars 27% Gea. Planisà era che la citad da Cuira surpiglia las parcellas nr. 7'066 e nr. 9'391 da la «Societad da construcziun City West» ch'han ina valita da circa 1,4 milliuns francs. Persuenter avess la citad surdà la parcella nr. 1'831 cun ina valita da 9,6 milliuns francs a la «Societad da construcziun City West» che avess en pli stuì pajar la differenza da bun 8,2 milliuns francs a la citad.
Cleramain Gea – cun 85% cunter 15% da las vuschs – ha la populaziun da Cuira ditg per definir las zonas d'aua. Quellas n'èn a Cuira per gronda part anc betg definidas uffizialmain. La Confederaziun aveva decidì il 2011 che quai è necessari per proteger las funcziuns natiralas d'auas currentas (flums ed auals). Perquai che questas zonas mancavan, valivan per il mument anc reglas pli strentgas che bloccavan tscherts projects da la citad.
Plinavant ha il suveran da Cuira approvà cleramain – cun bun 76% Gea cunter stgars 24% Na – la fusiun tranter la citad da Cuira e la vischnanca Tschiertschen-Praden. Tschiertschen-Praden aveva gia acceptà cun 114 cunter 21 vuschs.
Claustra
Il 2019 ha la scola primara a Claustra fatg midada. Uss vegn l'anteriura scola primara sanada ed adattada per daventar ina chasa culturala cun ina sala per occurrenzas privatas e publicas. Plinavant duai dar stanzas per sesidas, exposiziuns e co-working sco era total 10 emprimas abitaziuns en il bajetg (9 pitschnas ed ina pli gronda). Il suveran da Claustra ha approvà il credit da bun 5,5 milliuns francs cun 1'064 vuschs Gea cunter 347 vuschs Na. Da tut ils projects da votaziun era la partizipaziun cun passa 47% qua la pli auta.
Plinavant ha il suveran era approvà cleramain ina revisiun totala da la constituziun communala. Quai cun 930 vuschs Gea cunter 350 vuschs Na. Las structuras politicas duain restar las medemas sco fin uss. Pia ina suprastanza cun 5 commembers – inclus il president communal – ed in parlament communal cun 15 persunas. Nov na duain ils commembers da la suprastanza ed il president betg vegnids elegids il medem mument, mabain cun dus onns differenza, per evitar ina midada cumpletta da la suprastanza.
Da nov vul la vischnanca ina direcziun communala ch'è responsabla per ils fatgs operativs per sustegnair l'executiva. Quai era enfin uss vegnì reglà cun las cumpetenzas da delegar da la suprastanza. Uss duain vegnir fixads ils detagls. Era las cumpetenzas da finanzas duain s'augmentar levet.
Er il quint communal dals 2023 han ils e las da Claustra approvà cun 1'137 vuschs Gea cunter 212 vuschs Na. Il quint annual serra cun in gudogn da 70'519 francs.
Arosa
Il suveran d'Arosa lascha ir da la glatscha giu in project da bun 15,8 milliuns francs che dueva sminuir la mancanza da spazi d'abitar ad Arosa. Quai cun 50,2% Na cunter 49,8% Gea – ina differenza da tschintg vuschs. Planisà era en in'emprima etappa da spazzar e remplazzar l'immobiglia existenta «BlueWave» cun in edifizi nov. En ina segunda etappa dueva era la chasa communala che sa chatta gist sper il «BlueWave» vegnir spazzada e remplazzada. L'argumentaziun: Mo uschia fiss l'entir project stà rentabel. Ils dus edifizis novs duevan daventar in sulet bajetg ch'avess purschì circa 30 unitads d'abitar novas per famiglias indigenas e persunal da manaschis d'Arosa. Plinavant eran previs circa 30 plazzas da lavur per l'administraziun.
Plinavant ha il suveran reelegì Yvonne Altmann sco presidenta communala per la perioda d'uffizi 2025 fin 2028. Quai cun 594 da 920 vuschs. 210 cedels eran vits. Er la suprastanza han ils e las d'Arosa gì d'eleger. Là en tant ils candidats en uffizi sco er il candidat nov – Roger Moser da la Partida populara – vegnids elegids. Per il parlament datti quatter candidaturas novas. En il parlament n'hai per in candidat nov (Daniel Lütscher) e per in da fin qua (Reto Thomas Ruoss) betg tanschì per l'elecziun. Ils ulteriurs 14 candidats e candidatas èn vegnids reelegids.
Tusaun
Tusaun di cleramain Gea a la revisiun totala da la planisaziun locala. 68,5% dals votants e da las votantas èn per l’emprima revisiun totala dapi 30 onns. Entras quai vegnan uss las prescripziuns da Confederaziun e chantun dal 2014 integradas. In ulteriur motiv per la revisiun è la fusiun cun Mutten il 2018. En la revisiun èn era cumpigliadas la lescha da construcziun e la lescha d’allontanament d’aua persa e provediment d’aua. La participaziun è stada tar 32,2%.
Puntraschigna
Il suveran da Puntraschigna ha acceptà la revisiun totala da la constituziun communala. Cunquai installescha la vischnanca ina direcziun administrativa per separar la suprastanza pli fitg da la vart operativa. Plinavant vegn reducida la suprastanza d'actual set sin mo pli tschintg commembers e commembras. En l’avegnir decida plinavant il suveran a l’urna davart midaments en il plan da zonas, las leschas da fabrica, da las segundas abitaziuns, d'impostas e polizia ed il plan per l’access.
Il suveran aveva la schelta da duas variantas: votaziuns a l’urna u surdar questa cumpetenza a la radunanza communala.
Lumnezia
Daniel Solèr è vegnì reelegì e resta pia president communal da la vischnanca da Lumnezia fin la fin 2028. Solèr ha survegni tuttas da las 417 vuschs valaivlas – 36,3% dals abitants e da las abitantas da Lumnezia han dà giu lur vusch a l'urna. Ina cuntercandidatura n'hai betg dà.
En la suprastanza communala ha il suveran da Lumnezia elegì: Erwin Capeder, Gian Caduff, Daniel Blumenthal-Lombris e Martin Sgier.
Mustér
René Epp è vegnì reelegì sco president communal da la vischnanca da Mustér per la perioda d'uffizi 2025 fin 2028. El n'aveva nagina cuntercandidatura ed ha obtegnì en tut 475 vuschs dals 595 cedels ch'eran valaivels – 20% dals cedels mess a l'urna n'eran betg valaivels.
Landquart
Ils commember e las commembras da la suprastanza communala èn vegnids elegids: part da la suprastanza fan fin il 2028 Marion Zanetti (Il Center), Curdin Brändli (Il Center), Martin Heim (PPS), Katharina Hausmann-Hoppeler (PPS), Andreas Stalder (PLD) ed Helena Coiro Schwarz (SP).
Gia la primavaira ha Landquart elegì il nov president communal, Andreas Thöny.
Panaduz
Il suveran da Panaduz è sa decidì da betg prolungar en l'avegnir la concessiun per las ovras electricas cun Zervreila SA – cun 760 vuschs da total 913 cedels valaivels eri in cler Na. Las ovras electricas turnan cunquai en l'avegnir puspè en il possess da la vischnanca da Panaduz. Sa participà a la votaziun èn 38,28% da la populaziun da Panaduz.
Vaz/Obervaz
Il suveran da Vaz/Obervaz ha acceptà la revisiun parziala da la planisaziun locala che pertutga la staziun da val da la Rothornbahn cun bunamain 67,2%. Questa staziun da val ed ils edifizis vischinants han survegnì ina rolla centrala ils ultims onns per il turissem da stad e d'enviern. Suenter quest resultat pon la staziun e quests edifizis pia vegnir engrondids sco planisà per adattar els als basegns actuals. I duai per exempel dar abitaziuns per il persunal. Ids a l'urna per votar en chaussa èn bunamain 51,2% da la populaziun da Vaz/Obervaz.
Valragn
Christian Simmen-Schumacher è vegnì reelegì sco president communal per ils proxims trais onns. El ha survegnì 170 da 206 vuschs valaivlas. Ina cuntercandidatura per il post n'hai betg dà.
Era tar la suprastanza communala èn ils medems commembers vegnids reelegids per la perioda d'uffizi il 2027 cun naginas novas candidaturas.
Samignun
Il suveran da Samignun accepta cun ina gronda maioritad da prest 89% la nova lescha da votaziuns ed elecziuns communalas. I dovra la nova lescha perquai che las regulaziuns enfin uss èn stadas integradas en la constituziun communala veglia, ch’è vegnida revedida l’avust 2024. En la nova constituziun mancan regulaziuns per votaziuns ed elecziuns.
Era Gea din ils da Samignun a dus novs magazins per pitgas da siglientar lavinas al Piz Ot. Els acceptan in credit per installar dus magazins da 24 chargias explosivas, cunquai vegn la capacitad dublegiada.
Lantsch
Simon Willi resta president communal da la vischnanca da Lantsch per la perioda dal 2025 fin il 2027. El è vegnì reelegì cun 64 da 127 vuschs valaivlas – el ha pia gist anc cuntanschì la maioritad absoluta d'almain 64 vuschs. Bun 40,9% dals abitants e las abitantas da Lantsch han purtà lur vusch a l'urna. El è stà il sulet candidat uffizial, péro ha Sandro Lenz – ch'era gia en la suprastanza communala – survegnì 39 vuschs.
En la suprastanza communala èn ils quatter commembers actuals – Sandro Lenz, Fabian Simeon, Armon Margreth e Daniel Ulber – vegnì reelegids.
Tavau
Cun 51% participaziun ha Tavau elegì la suprastanza, il pitschen Landrat. Elegids èn Jürg Zürcher (PLD, fin uss), Walter von Ballmoos (PVL, fin uss), Claudia Bieler (PS, nov) e Valérie Favre Accola (PPS, nov). Cunquai è la PPS puspè enavos en la suprastanza, la PLD perda in plaz.
Era il parlament, il grond Landrat è vegnì elegì. Quest gremi ha 17 commembers e commembras. Tut ils cussegliers e cusseglieras en uffizi ch'han candidà èn vegnids reelegids. En la cumposiziun tenor partidas hai dà intginas midadas:
- Partida populara svizra (PPS) 5 sezs (+1)
- Partida liberaldemocratica (PLD) 5 sezs (-1)
- Partida socialdemocratica (PS) 3 sezs (+1)
- Allianza dal Center (AdC) 2 sezs (+1)
- Partida verd-liberala (PVL) 1 sez (=)
Nagins sezs pli ha la Partida evangelica da la Svizra (PEV) e nagin dals commembers e commembers è pli senza partida.
Il Landamma è gia vegnì confermà ils 7 d'avrigl da quest onn.