- Gabriella Binkert Becchetti: 507 vuschs
- Thomas Schadegg: 278 vuschs
- Singuls: 2 vuschs
Participaziun a l'elecziun: 72,2%
Cun uschè in resultat cler n'avessia ella betg fatg quint, ha ditg Gabriella Binkert Becchetti envers RTR curt suenter sia elecziun. Ella saja perquai levgiada ed engraziaivla per las vuschs. Quest resultat saja ina buna basa da lavurar vinavant. Binkert Becchetti vul cunzunt metter pais sin temas sco ina buna scola en la val, il sviament da Sta. Maria e manar vinavant la vischnanca cun tut ils pensums dal mintga di. Il cumbat electoral saja stà las ultimas emnas disagreabel ed emoziunal. Ina situaziun betg encouschenta en la vallada, perquai è la politicra uss leda che quai è passà.
Impurtant è ch'il clima en Val Müstair daventa puspè pli quiet. Nus pudain be gudagnar ensemen ed essan memia pitschens per far dispita.
Il resultat cler da la presidenta Gabriella Binkert-Bechetti saja ina gronda motivaziun per cuntinuar cun la lavur, sco ella ha ditg. En avegnir prevesa ella da tadlar meglier ils quitads da la populaziun.
Sch'insatgi di a mai che jau na saja betg simpatica lura na poss jau far nagut, ma sche insatgi vegn vers mai cun ideas constructivas lura vuless jau tadlar meglier en l'avegnir.
Ussa segua l’elecziun da la suprastanza communala
6 enstagl da 4 persunas datti en avegnir en la suprastanza communala a Val Müstair a partir dal 2025. L’unic candidat da fin qua è Chasper Stuppan. Ils auters trais candidats, numnadamain Leonora Leu-Fallet, Jachen Armon Pitsch e Riet Scandella candideschan nov. Els n'han betg propi experientscha politica. Per la presidenta Gabriella Binkert-Bechetti èsi impurtant d'avair ina buna collavuraziun e main l’experientscha. Causa che gist trais giuvens candideschan, prevesa ella da promover dapli il tema «digitalisaziun» en la vischnanca. Las elecziuns da la suprastanza, da la cumissiun da gestiun, dal cussegl da scola e da la cumissiun da fabrica han lieu ils 3 da november.
Gia avant han Thomas Schadegg sco era Ivo Lamprecht communitgà da be cuntinuar cun lur lavur en suprastanza sche Thomas Schadegg daventa president communal. En la debatta avant l'elecziun era la communicaziun tranter la suprastanza e Gabriella Binkert Becchetti vegnida crititgada fermamain dals dus opponents – Ivo Lamprecht e Thomas Schadegg.
Dumengia ha RTR era empruvà da pigliar si contact cun Thomas Schadegg, ma senza success. Il glindesdi a bun'ura ha el informà al telefon ch'el na veglia betg prender posiziun. Plinavant ha el scrit vers saira in mail ch'el saja pront da prender posiziun be sche la presidenta Gabriella Binkert-Bechetti po confermar a scrit las manzegnas ch'ella pretendia envers el.
Emprim scrutini – cuntenta da betg avair gudagnà cun ina vusch
En l'emprim scrutini ils 22 da settember aveva Gabriella Binkert Becchetti manchentà be per ina vusch la maioritad absoluta e fatg en tut 361 vuschs. A Thomas Schadegg avevan 218 persunas dà la vusch. Avess ella gudagnà l'elecziun uschè stgars na fiss quai betg stà bun per la communitad en Val Müstair, aveva ditg Gabriella Binkert Becchetti suenter l'elecziun envers RTR. Ses contrahents avessan segir fatg recurs.
Il concurrent Thomas Schadegg aveva fatg 218 vuschs en l'emprim scrutini ed era sa mussà cuntent cun quest resultat. Qual animeschia da far vinavant e mussia che blers na sajan betg cuntents cun la situaziun en la vischnanca da Val Müstair. Schadegg ch'è en suprastanza era malcuntent cun la collavuraziun en il gremi e cun la situaziun. Sper el aveva en l'emprim scrutini er il suprastant Ivo Lamprecht candidà per il presidi. Per il segund scrutini n'è el betg pli stà a disposiziun.
