Andreas Thöny da la partida socialdemocratica è elegì sco nov president da vischnanca da Landquart El ha survegnì 1'599 vuschs, ses cuntracandidat, Martin Heim, ha survegnì 903 vuschs. La participaziun è stada tar 48,4%. Thöny suonda a Sepp Föhn , il president en uffizi, che dat giu ses post per la fin da l'onn 2024, suenter bun 10 onns en uffizi.
Jau m'allegrel fitg che il resultat è uschè clers. En il cumbat electoral sun jau s'engaschads fitg da tadlar tiers a la glieud. Perquai sun jau uss anc pli cuntent che quai è gartegià.
Andreas Thöny – gia daditg en la politica
Andreas Thöny ha 55 onns. El è stà blers onns en la suprastanza communala ed en il Cussegl grond. Latiers è el stà engaschads en divers gremis, tranter auter en il cussegl administrativ da la Viafier retica. Andreas Thöny è manader da l'uffizi per societad da la citad da Cuira. Il socialdemocrat vesa surtut sia experientscha politica ed era da manar sco avantatgs. El descriva sa sez sco communicativ, cun ina ureglia averta ed orientà a soluziuns. Andreas Thöny vul s'engaschar per dapli innovaziun, scolaziun e dapli raits en l'economia, per medemas schanzas per ils uffants e per che la vischnanca fa in pass envers la neutralitad dal clima.
