Sco in fil cotschen s’ha quai tratg tras durant tut la saira: La communicaziun e collavuraziun tranter la suprastanza e la presidenta Gabriella Binkert-Bechetti para dad esser tut auter che buna.
A l’entschatta dal discurs al podium han ins tematisà il tema collavuraziun. Entant che la presidenta Gabriella Binkert-Bechetti attestescha ina detg buna collavuraziun eran ils candidats Ivo Lamprecht e Thomas Schadegg da tut in'autra opiniun. La collavuraziun tranter la presidenta en carica ed ils dus candidats che sesan actualmain en la suprastanza communala è tut autra che fritgaivla.
Ed era durant la discussiun davart ils projects impurtants per la Val Müstair han ins constatà sco aspectatur ina enorma discrepanza quai che reguarda la dumonda co che projects sco per exempel il sviament da la fracziun Sta. Maria, la renovaziun da l'albiert per la giuventetgna u la fusiun da las scolas duain vegnir realisads.
Bunamain 100 abitantas ed abitants èn vegnids venderdi saira al podium a Sta. Maria, organisà da la societad «Mia Val Müstair», ina societad politicamain ed era confessiunalmain neutrala. Manà tras il discurs ha David Truttmann, il schefredactur da la FMR.
Trais candidaturas
Per il presidi da la vischnanca da Val Müstair datti trais candidaturas, sco quai ch'il chanzlist da la vischnanca ha confermà sin dumonda da RTR:
Ivo Lamprecht. El è pur a Lü, è actualmain en suprastanza communala ed è tranter auter responsabel per ils ressorts militar e protecziun civila e per la polizia.
Thomas Schadegg ha gia annunzià pli baud sia candidatura. El è actualmain responsabel en la suprastanza da la vischnanca per il departament da planisaziun, construcziun ed infrastructura. Schadegg è interprendider en la branscha da construcziun e maina cun sia dunna in hotel.
Era gia annunzià pli baud sia candidatura ha la presidenta en uffizi Gabriella Binkert-Becchetti. Ella è en la suprastanza da la Partida populara svizra dal Grischun ed è interprendidra e pura d'agroturissem.
Cunquai ch'il termin d'annunzia è scadì la fin fanadur èn els trais candidats uffizials. Tenor il chanzlist Not Manatschal, sajan candidaturas selvadias però senz'auter pussaivlas. Ils votants e las votantas pon tscherner lur president u presidenta ils 22 da settember.
