L'areal en il vest da Cuira duai en l'avegnir daventar in segund center da la citad – plain vita cun abitaziuns, fatschentas e plazzas da lavur. Central per realisar quest project è tenor la citad che la staziun da tren a Cuira vest vegn engrondida. Planisà èsi che las lavurs da construcziun èn a fin la stad 2026. Perquai avess la citad gugent surpiglià las duas parcellas – che sa chattan gist tar la staziun – da la «Societad da construcziun City West».
Suenter il cler Na da la populaziun da Cuira restan quellas parcellas dentant en possess da la «Societad da construcziun City West». Tenor la citad munta quest Na per exempel che l'entrada da la staziun vegn pli pitschna che planisà. Per l'autra pudess la realisaziun dal project Cuira vest en general daventar pli cumplitgada e durar pli ditg che planisà. Tar la «Societad da construcziun City West» tutgan numnadamain quatter possessurs – quai munta ch'era pliras partidas pon avair pled en chapitel tar mintga decisiun. Tenor l'Uffizi dal register funsil èn ils possessurs Domenig Immobilien AG – che posseda blers edifizis en tut la citad da Cuira – Sachs Finanz AG, Bruma Immobilien Chur AG e la Strada Privata AG.
Cuntinuar cun la staziun – però surlavurar la plazza
Sco quai che la citad da Cuira communitgescha, possian ins cuntinuar la construcziun da la staziun da viafier Cuira vest. Dad engrondir la staziun sco previs saja ussa però betg pli pussaivel, uschia che la planisaziun da la plazza da la staziun stoppia vegnir surlavurada anc ina giada. Il plan da sviluppar il quartier Cuira vest ad in center urban restia però vinavant la strategia da la citad.
Project e cifras ch'ha chaschunà grondas discussiuns
La citad aveva planisà da surpigliar duas parcellas da la «Societad da construcziun City West». Persuenter avess ella surdà duas da sias parcellas a la societad Cuira Vest. Quai aveva procurà per grondas discussiuns. Tenor la citad da Cuira fissia el stà in pass central per sviluppar la part Cuira Vest che saja da grond'impurtanza per l'avegnir da la citad. Il comité cunter quest project ha percunter ditg, ch'i sa tractia plitost d'ina vendita da funs, che d'in barat fair. Però betg mo ils arguments han procurà per discussiuns, mabain era che novas cifras per il barat da las parcellas eran vegnidas enconuschentas curt avant la votaziun.
