I na dettia nagin che na lessia betg lavurar si ils cas d'abus sexual dal passà e tuts veglian prevegnir tals cas en l'avegnir, di Joseph Maria Bonnemain, l'uvestg da Cuira e responsabel en chaussa tar la conferenza episcopala. El sappia dentant era che tut giaja plitost plaun en la baselgia catolica.
Jau chapesch ch'ils pertutgads e las pertutgadas n'han nagina pazienza pli. Era jau sun malpazient.
I dovria dentant temp enfin ch'ins haja elavurà mesiras effectivas che duain esser in bun agid per tuts, di el.
In studi da l'Universitad da Turitg ha chattà radund 1'000 cas d'abus sexual en la baselgia catolica dapi ils onns 1950. La baselgia vul lavurar si quai ed evitar tals cas en il futur. Uss ha ella infurmà davart il stan da las mesiras:
- A partir dal schaner 2025 duai la cooperaziun cun ils posts d'agid per victimas chantunals cumenzar. Ina participaziun finanziala da la Baselgia als posts d'agid per victimas è ina opziun. Il concept da basa per la collavuraziun tranter il post da coordinaziun ed infurmaziun da la baselgia ed ils posts d'agid per victimas stat. Detagls e standards naziunals unifitgads stoppian anc vegnir elavurads. Ils process da cussegliaziun, d'annunzia e da tractament da cas duain vegnir separads.
- Il 2025 duain aspirants per tscherts uffizis entaifer la baselgia vegnir examinads psicologicamain sch'els èn adattads per il servetsch. La finamira a lunga vista saja da giuditgar tut ils collavuraturs e collavuraturas da la baselgia catolica. Qua stoppian dentant anc vegnir sclerids criteris e responsabladads, tranter auter er tgi che dastga far tals scleriments e sche persunas ch'èn gia en uffizi ston er passar tras tschertas examinaziuns. Er la dumonda tge che capita en cas nua che las examinaziuns mussan potenzial da svilup u ristgs è anc da sclerir.
- Enfin il december 2024 duai dar novs standards per dossiers da persunal. Quai duai far pli simpel ils proceders e procurar per reglas standardisadas per parter infurmaziuns d'abus sexual tranter plaivs e diocesas. L'introducziun dals standards è previda per il cumenzament 2025.
- Spustà sin il 2025 vegn in'elavuraziun d'in proceder unifitgà en Svizra davart l'emissiun d'actas da la baselgia - vul dir in reglement unifitgà co las instituziuns da la baselgia dattan or actas cun connex d'abus sexual. Ils responsabels da diocesas e baselgias chantunalas èn s'obligads da destruir naginas actas che han in connex cun abus sexual. Er ils urdens duessan sa participar a quella obligaziun – qua na datti però naginas infurmaziuns quants che sa participeschan e quants betg.
- Enfin l'atun 2024 datti in sboz per in concept davart ina dretgira penala ecclesiastica naziunala che duai per part remplazzar las dretgiras da las diocesas. A questa dretgira naziunala duain er persunas dal fatg or da la scienza sa participar.
- Il 2027 duain ils resultats d'in'ulteriura perscrutaziun scientifica vegnir preschentads. Per quest project stattan a disposiziun 1,5 milliuns francs. Ils resultats dal davos studi duain vegnir approfundads. La finamira è d'examinar las circumstanzas sut las qualas ils cas d'abus èn vegnids zuppentads. Persunas pertutgadas vegnan supplitgadas da s'annunziar tar: forschung-missbrauch@hist.uzh.ch.
Davart questas mesiras han infurmà differentas unitads da la baselgia catolica svizra. Tar questas tutgan la Conferenza dals uvestgs svizzers, la Conferenza centrala catolic-romana da la Svizra, la Conferenza da l'Uniun dals urdens ed ulteriuras cuminanzas d'urden.
Perscrutaziun scientifica er en la baselgia evangelica refurmada
L'avrigl 2024 ha er la il Cussegl da la baselgia evangelica refurmada svizra dà en incumbensa in studi davart abus sexual. Quest studi fa il center per religiun, economia e politica da l'universitad da Lucerna. Da dar en incumbensa in studi communabel da la baselgia catolica e refurmada è stà ina opziun, ma tenor ils responsabels betg stà realisabel pervi da differents puncts da partenza organisatorics. Ils teams e responsabels sa barattian e collavurian però regularmain.
