Las scuvertas davart ils abus en la Baselgia catolica sajan era stads tema al Seminari da spirituals a Cuira. Quai di ses manader, l'uschenumnà Regens, Daniel Krieg. La tematica saja vegnida discutada activamain, ed els hajan mess a disposiziun material d'infurmaziun, uschia ch'ils students possian s'infurmar.
En il Schurnal regiunal da SRF di Krieg, ch'el e ses team vulan examinar en l'avegnir in pau pli exact sin quels che prendan en mira da daventar sacerdot. In'examinaziun suenter l'onn d'introducziun duai esser obligatorica.
Scolaziun sa mida a moda moderata
La fin dal proxim onn duessan ils criteris per quella examinaziun esser definids. Vers la fin dal studi è previs ina tgira pli stretga e tar in'ordinaziun duess quella purschida vegnir offrida vinavant ils emprims pèr onns. Tenor Daniel Krieg sa mida la scolaziun al Seminari da spirituals Sogn Gliezi a Cuira pia, dentant mo en moda e maniera moderata. Suenter tut quai che saja capità na craja el betg ch'ils spirituals destrueschian anc ina giada la fidanza en els.
I dovra temp, fin ch'i vegn a sa mussar sche la Baselgia catolica dumogna la midada interna e po uschia puspè gudagnar enavos la fidanza dal pievel da baselgia.
