La baselgia catolica ha decis da cuntinuar la retschertga scientifica davart il tema abus sexual. Las constataziuns scientificas dal project pudessan gidar da surmuntar structuras che favuriseschan abus sexual en la baselgia. I sa tracta d'in project da perscrutaziun sur trais onns che l'Universitad da Turitg fa, han communitgà la Conferenza dals uvestgs svizzers, la Conferenza centrala catolic-romana e l’Uniun dals urdens catolics en Svizra.
Cuntinuaziun da project da l'Universitad da Turitg
La fin dal 2021 avevan ellas gia laschà far in project da pilot en connex cun l'istorgia da l'abus sexual en il conturn da la Baselgia catolic-romana en Svizra dapi la mesadad dal 20avel tschientaner. Il settember vegnian preschentads ils resultats da quest project da pilot da l'Universitad da Turitg. Sper ils resultats vegnian er preschentadas mesiras che suondan or dal studi ed il cuntegn da la cuntinuaziun dal studi per ils onns 2024 fin 2026.
