67 dals 1'002 cas revelads dal studi da l'Universitad da Turitg èn capitads tranter ils onns 2010 e 2023. En connex cun quels vegn er la procura publica grischuna activa, sco SRF scriva. I na saja dentant betg simpel da verifitgar ils delinquents anonimisads, hai num da vart da la procura publica dal Grischun.
Entant ha l'uvestg da Cuira Joseph Maria Bonnemain prendì posiziun en la «Samstagsrundschau» da SRF. El saja pront per ina midada da la cultura en la baselgia per «minimisar» ils privels per ulteriurs cas d'abus en il futur. El saja er avert per abolir il celibat. Quel saja betg l'origin per l'abus, dentant in factur che n'è betg da negliger.
L’emna passada ha in studi da l’Universitad da Turitg revelà 1'002 cas d’abus sexual entaifer la baselgia catolica ils ultims 70 onns. Ils pli blers cas hai tenor SRF dà ils onns 1950 enfin 1970. En consequenza èn quels cas scadids ed i na fiss betg pli pussaivel da chastiar ils delinquents. Malgrà quai vegnan sper la procura publica grischuna er la procura publica da Son Gagl e la procura publica dal Vallais activas.