Il Premi Nobel da medischina 2024 va als scienzads americans Victor Ambross e Gary Ruvkun. Els survegnan il premi per avair scuvrì l'uschenumnada «microRNA» e la rolla che quella gioga en la regulaziun da gens. RNA è ina part moleculara che vegn stgafida per transcriver infurmaziuns geneticas. Or da quellas infurmaziuns vegnan lura fatgs proteins ed autras parts ch'il corp dovra. La RNA ha pia ina grond'influenza sin las funcziuns dal corp.
Tut ils dus scienziads lavuran tar top-universitads. Ambros lavura actualmain a l'University of Massachusetts Medical School, Ruvkun è professur a la Harward Medical School.
Dapi il 1901 èn 227 persunas vegnidas onuradas cun il Premi Nobel da medischina. Il premi è dotà cun 11 milliuns curunas svedaisas, quai èn var 910'000 francs. Il Premi Nobel vala sco premi il pli enconuschent e renumnà dal mund. Tradizunalmain vegn il premi surdà ils 10 da december, il di da mort dad Alfred Nobel.
Premi per il bun sin il mund
Il premi nobel vegn surdà dapi il 1901 mintg'onn. Inizià el ha il scienzià svedais Alfred Nobel, ch'aveva inventà il dinamit. Tras quai è el vegnì ritg, ha dentant era gì nauscha conscienza perquai ch'il dinamit vegniva duvrà sco arma. En ses testament ha el lura scrit, che sia facultad duaja vegnir duvrada per in premi per quels che «han purtà il pli grond niz per l'umanitad en l'onn passà».
