- Il premi Nobel da litteratura va quest onn a Han Kang.
- Quai ha l'Academia svedaisa annunzià a Stockholm.
- La purtadra dal premi Nobel da litteratura survegn circa 970'000 francs.
L'autura da la Corea dal Sid, Han Kang, vegn undrada quest onn cun il premi Nobel da litteratura. Quai ha communitgà l'academia svedaisa a Stockholm. Ella survegn il premi litterar «per sia prosa poetica intensiva che fa frunt a traumas istorics e mussa la fragilitad da la vita umana», ha ditg il secretari permanent da l'academia, Mats Malm, a chaschun da la publicaziun dals premis.
Han Kang è la 18avla dunna che survegn il premi Nobel da litteratura – e l'emprima dunna tranter ils titulars dal premi Nobel annunziads fin uss quest onn. L'onn passà è il premi Nobel da litteratura ì al Norvegiais Jon Fosse. L'onn avant era medemamain vegnì declerà cun la Franzosa Annie Ernaux in grond num da la litteratura mundiala sco purtadra dal premi Nobel.
Dapi l'emprima surdada dals premis l'onn 1901 èn vegnids numnads totalmain 121 titularas e titulars dal Premi Nobel da litteratura.
