Il Premi Nobel da fisica va quest onn als dus perscrutaders John J. Hopfield dals Stadis Unids e Geoffrey E. Hinton dal Canada per lur lavur en il sectur da l’emprender mecanic cun raits neuronalas artifizialas. Quai ha communitgà l'institut da Karolinska a Stockholm. Il premi Nobel è dotà cun var 900'000 francs e vegn surdà ils 10 da december. Quai è il di da la mort dal donatur dal premi Alfred Nobel.
Hopfield (91) e Hinton (76) hajan duvrà utensils da la fisica e mess il crap da fundament per l'emprender cun agid da la maschina, communitgescha l'Academia royala svedaisa. «L'emprender maschinal sin basa da raits neuronalas artifizialas revoluziunescha actualmain la scienza, la tecnica e la vita da mintgadi», uschia il parsura dal comité Nobel per fisica.
Premi per la rait da Hopfield e la maschina da Boltzmann
Hopfield ha inventà ina rait ch'è vegnida numnada tenor el e che applitgescha ina metoda per arcunar e restaurar musters. Hinton, naschì en Gronda Britannia, ha duvrà questa rait da Hopfield sco basa per ina nova rait che applitgescha in'autra metoda, la maschina da Boltzmann. Quella po emprender d'identifitgar elements caracteristics en in tschert gener da datas.
Avant tschintg onns han ils astronoms svizzers Didier Queloz e Michel Mayor gudagnà il premi Nobel da fisica. Els han scuvert l'emprim planet ordaifer nos sistem solar.
Surdada dals premis tenor la davosa voluntad dad Alfred Nobel
Ils premis Nobel duain tenor il testament dad Alfred Nobel undrar quels che han demussà il pli grond niz a l'umanitad en las singulas categorias l'onn precedent. Fin a trais persunas pon vegnir undradas. Gist en las categorias da scienza èsi savens da constatar che pliras persunas vegnan undradas communablamain che han per exempel perscrutà davart il medem champ tematic.
