1. Tgi ha fundà il Premi Nobel
Il scienzià svedais Alfred Nobel ha inventà il dinamit. Tras quai è el vegnì ritg. En ses testament ha el lura scrit, che sia facultad duai vegnir duvrada per in premi per quels che «han purtà il pli grond niz per l'umanitad en l'onn passà». Dapi il 1901 vegn il premi surdà mintg'onn.
2. Tge categorias datti
Ils premis Nobel vegnan surdads mintg'onn a persunas ch'han fatg insatge extraordinari en lur champ. I dat tschintg categorias: la fisica, la chemia, la medischina, la litteratura e la pasch.
Plinavant datti il Premi da memoria dad Alfred Nobel per scienzas economicas. Quel premi vegn surdà dapi il 1968 da la Banca naziunala svedaisa. Adina puspè datti cuntraversas sche quel premi è dentant propi en il senn dad Alfred Nobel.
3. Tgi decida tgi che gudogna?
L'Academia roiala svedaisa da las scienzas trametta mintg'onn invits a 3'000 scienzadas e scienzads. Quels pon lura far propostas tgi che pudess gudagnar. Las propostas ston vegnir scrittas a maun. Tgi che gudogna lura la fin decidan lura pliras expertas ed experts, tranter auter da l'Academia svedaisa da las scienzas u da l'Institut da Karolinska.
4. Tge survegnan las persunas undradas
In document, ina medaglia e la summa dal premi da 11 milliuns curunas svedaisas, radund 900'000 francs.
5. Tgi da la Svizra ha gia gudagnà il premi?
Gia 40 giadas è in Premi Nobel vegnì surdà a persunas ubain organisaziuns da la Svizra. Gia cura ch'il premi è vegnì surdà l'emprima giada, ha in Svizzer retschavì il Premi Nobel da pasch: Henry Dunant, il fundatur da la Crusch Cotschna Internaziunala. L'onn suenter, 1902, han lura Elie Ducommun e Charles Albert Gobat survegnì il premi ensemen.
1948 hai dà ina decisiun dispitaivla da la giuria. Paul Hermann Müller ha survegnì il Premi Nobel da medischina per ses insecticid «DDT». Il qual è vegnì silsuenter duvrà sin l'entir mund, ha dentant chaschunà donns en l'ambient ed è vegnì scumandà pervia da la supposiziun ch'el chaschunia cancer.
Tranter ils auters premiads da la Svizra tutgan la Crusch Cotschna ubain «Medis senza cunfins», sco er per exempel Kurt Wüthrich, Jacques Dubochet, Heinrich Rohrer ubain – avant quatter onns – Michel Mayor e Didier Queloz.