Il Premi Nobel da la pasch va quest onn a l’organisaziun giapunaisa Nihon Hidankyo. L’organisaziun ch’è er enconuschenta sco Hibakusha vegn onurada per sias stentas a favur d’in mund senza armas atomaras. Quai ha communitgà il comité Nobel ad Oslo.
L'organisaziun Nihon Hidankyo è vegnida fundada l'onn 1956 en commemoraziun da las victimas da Hiroshima e Nagasaki e per sustegnair ils survivents e las surviventas.
Questa giada èn vegnids nominads totalmain 286 candidatas e candidats, tranter quels 197 persunalitads ed 89 organisaziuns. Cumpareglià cun ils onns precedents è il champ da candidats sa diminuì considerablamain. Tgi ch'è tranter ils nominads na vegn betg tradì.
L'onn passà è il premi ì a l'activista per ils dretgs da las dunnas, Mohammadi, ch'è dapi in temp en praschun en sia patria iranaisa. Ella è vegnida onurada «per ses cumbat cunter la suppressiun da las dunnas en l'Iran e per ses cumbat per la promoziun dals dretgs umans e da la libertad per tuts».
Persunas singulas sco er organisaziuns pon vegnir onuradas
Dapi l'emprima surdada dal premi 1901 èn fin ussa 111 persunas singulas e 27 differentas organisaziuns vegnidas onuradas cun il premi Nobel da la pasch, l'ovra d'agid per ils fugitivs UNHCR da la ONU gist duas giadas ed il comité internaziunal da la Crusch cotschna schizunt trais giadas.
Ils premis Nobel da medischina, fisica, chemia e litteratura, economia e pasch vegnan surdads ils 10 da december. Quai è il di da la mort dal donatur dal premi Alfred Nobel.
