19 da settember – il funeral
Tenor protocol il 10avel di suenter la mort sia mort, vegn la regina sepulida cun ina gronda ceremonia. Tenor in pledader da la polizia n'haja anc mai dà ina acziun da tala dimensiun per garantir la segirezza da tuts e tuttas participantas. Er il traffic aviatic è vegni reducì. Uschia èn passà 100 sgols a l'eroport da Heathrow vegnids stritgads per garantir il silenzi durant la ceremonia.
18 da settember
La dimensiun da l'entira ceremonia enturn la sepultura da la Queen Elisabeth II èn ina sfida logistica. Saja quai per la polizia u l'armada, ma er per il traffic public. Il schef da las autoritads da transport da Londra quintia cun enfin in milliun persunas, sco l'agentura da novitads PA rapporta. Per pudair surmuntar la sfida vegnian mess en bus e trens supplementars e fermadas da bus e staziuns da la metro vegnian per part serradas.
17 da settember
Millis vulan prender cumià da la regnina. Las autoritads da Londra han avertì da vegnir en la citad. Il temp da spetga muntava fina a 24 uras. La colonna maina plirs kilometers tras Londra. Millis da persunas hajan già spetgà la notg sin sonda tar temperaturas sut 10 grads.
13 da settember
ll president da la Confederaziun, Ignazio Cassis represchenta la Svizra a la sepultura da Queen Elisabeth II. El haja acceptà l'invit sco i ha gì num envers l’agentura da novitads Keystone-SDA. En la Westminster Abbey vegnan spetgadas radund 500 persunas da renum politic e cultural che fan part al funeral statal l’auter glindesdi. Tranter auter prendan il president american Joe Biden ed il president franzos Emmanuel Macron part. Mardi saira è la bara da la Queen arrivada a Londra en il Buckingham Palace. Mesemna datti lura ina processiun enfin tar il parlament, nua che la bara resta lura plirs dis, per che la publicitad possia prender cumià da la Queen.
12 da settember
Retg Charles III e sia dunna Camilla èn arrivads en Scozia. Ad Edinburgh han els accumpagnà il vaschè cun la regina defuncta en ina processiun da malencurada fin tar la catedrala da St. Giles. Là hai dà in servetsch divin d'engraziament. Il mardi saira vegn lura il vaschè da la Queen transportà a Londra.
-
Bild 1 von 3Legenda: Retg Charles III, princessa Anne, prinzi Andrew e prinzi Edward van davos il vaschè da la Queen vers la catedrala St. Giles a Edinburgh. Reuters
-
Bild 2 von 3Legenda: Il vaschè cun la bara da la Queen è arrivà a Edinburgh. Reuters
-
Bild 3 von 3Legenda: Retg Charles II, sia dunna e regina consorta Camilla, princessa Anne, prinzi Andrew e prinzi Edward fan part dal servetsch divin en la catedrala St. Giles ad Edinburgh. Reuters
Il retg Charles il terz ha per l'emprima giada fatg in pled en il parlament britannic a Londra. El veglia suandar a l'exempel da sia mamma e mantegnair ils princips custaivels da la regenza constituziunala sin ils quals lur naziun sa basia, uschia il retg.
-
Bild 1 von 2Legenda: Retg Charles III en il parlament (entamez). El vegn accumpagnà dal prinzi William e sia dunna Camilla ch'è uss «Queen consort». Keystone
-
Bild 2 von 2Legenda: Retg Charles III tar ses emprim pled en la Westminster Hall, la sedia dal parlament da la Gronda Britannia. «Il parlament saja l'instrument viv da nossa democrazia», ha Charles ditg. Reuters
11 da settember
-
Bild 1 von 2Legenda: L'auto cun la defuncta regina arriva da Balmoral ad Edinburgh en Scozia. Keystone
-
Bild 2 von 2Legenda: La dumengia a las 10:00 è il vaschè da la regina Elizabeth II sa mess a viadi davent dal chastè Balmoral vers la chapitala scotta dad Edinburgh. Savens è l'auto avanzà be plaun, quai per che la blera glieud che steva a l'ur da la via ha pudì prender cumià da lur regina. Intginas persunas han bittà flurs en via. Keystone
La dumengia ha il vaschè da la regina bandunà il palaz a Balmoral nua ch'ella è morta. Davent da là è la regina sa messa sin ses ultim viadi. L'emprima fermada è ad Edinburgh, nua che Scottas e Scots pon prender cumià.
10 da settember
Dus dis suenter la mort da regina Elizabeth II è ses figl Charles vegnì proclamà uffizialmain sco nov retg . L’uschenumnà cussegl da curuna è vegnì ensemen en il palaz da St. James per far quai. Suenter la proclamaziun ha il nov retg discurrì davant il cussegl da curuna – che sa cumpona da represchentants da la famiglia roiala, politica, baselgia e societad. Retg Charles III ha ditg che sia mamma laschia enavos grondas passidas. El saja conscient da la responsabladad, che tutgia tar ses uffizi. El veglia suandar a l’exempel da sia mamma e s’engaschar per pasch e bainstar.
9 da settember
In di suenter la mort da sia mamma, regina Elizabeth II, è Charles III sa drizzà cun in pled a la naziun.
Charischma mamma, entant che ti cumenzas tes ultim viadi vers mes char bab trapassà, vi jau dir be insatge: grazia. Grazia per tia amur e tes sacrifizi per nossa famiglia e per tut las naziuns che ti has servì en tut quests onns.