Anc il suentermezdi aveva in pledader dal palaz annunzià ch'ils medis da la regina sajan preoccupads pervi da sia sanadad. En consequenza è la famiglia da la Queen sa messa sin viadi vers la Scozia. La gievgia saira ha il Buckingham Palace lura annunzià che la Queen è morta en la vegliadetgna da 96 onns. Ils uffants da regina Elizabeth II èn restads la gievgia saira en Scozia. Il venderdi è la famiglia roiala lura returnada a Londra.
Il figl dad Elizabeth, il prinzi Charles, vegn a surpigliar il tron e daventa retg en la vegliadetgna da 73 onns. Sia encurunaziun uffiziala vegn ad esser uschè spert sco pussibel a Londra. Gia enconuschent è il num ch'el vegn a purtar sco retg: King Charles III.
Ina èra va a fin
Elizabeth II era dapi 70 onns sin il tron – e cun quai regina da la Gronda Britannia, l'Irlanda dal Nord, il Canada, l'Australia ed anc ulteriurs pajais or dal Commonwealth. Nagin auter monarc britannic n'è stà uschè ditg a la pussanza sco ella.
- 1926: Ils 21 d’avrigl è Elizabeth II naschida a Mayfair, Londra. Ella era l’uffant il pli vegl dal retg Georg VI e sia dunna, la regina Elizabeth.
- 1947: Elizabeth marida ses um, Philip en la Westminster Abbey.
- 1948: Prinzi Charles, l’emprim uffant dad Elizabeth, vegn sin il mund. Ad el seguan Anne (1950), Andrew (1960) ed Edward (1964).
- 1952: Suenter la mort da ses bab vegn Elizabeth proclamada sco «Queen».
- 1953 : L’encurunaziun en l’abazia Westminster.
- 1992: Il 40avel onn sco regina titulescha la Queen sco «annus horribilis» (onn da sgarschur). Il mars è il prinzi Andrew sa spartì da sia dunna, l’avrigl è il divorzi da la princessa Anne, il november vegn ina part dal palazi Windsor destruì tras in fieu, il december sa sparta Charles da la princessa Diana.
- 1997: Accident mortal da princessa Diana a Paris.
- 2002: La mamma dad Elizabeth – l’uschenumnada «Queen Mum» – mora.
- 2013: Cun prinzi George nascha l’emprim sutbiadi dad Elizabeth II.
- 2015: Ils 9 da settember 2015 è la Queen dapi 23'226 dis en uffizi – in record en l’istorgia britannica.
- 2021: Ses um, prinzi Philip, mora en la vegliadetgna da 99 onns.
- 2022: La Queen festivescha ses 70avel anniversari sin il tron.
Gia en la vegliadetgna da 25 onns – l'onn 1952 – è Elizabeth II vegnida proclamada sco nova regenta. Bain na posseda la regina da la Gronda Britannia bunamain nagina pussanza politica, e tuttina vala ella sco ina da las persunas remartgablas da l'istorgia giuvna. Entaifer la Gronda Britannia valeva la «Queen» sco simbol per conscienziusadad e stabilitad – er en temp da crisas e turbulenzas.
-
Bild 1 von 4. 20.11.1947. La regina Elisabeth II e Philip maridan. Bildquelle: Keystone.
-
Bild 2 von 4. 02.06.1953. Elizabeth II tar sia encurunaziun. Bildquelle: Keystone.
-
Bild 3 von 4. 1980. Qua tar ina visita uffiziala en Svizra, accumpagnà dal cusseglier federal Georges-André Chevallaz. Bildquelle: Keystone.
-
Bild 4 von 4. 2022. Ina da las ultimas fotografias cun il prinzi ereditari Charles. Bildquelle: Keystone.
Cassis s'exprima per la Svizra
Il president da la Confederaziun Ignazio Cassis ha condolà a la famiglia roiala britannica. La Queen vegnia a restar en memoria sco dunna cun gronda forza ed ina direcziun stabla, uschia Cassis la gievgia sin Twitter. Il venderdi ha il president da la Confederaziun lura anc ina giada exprimì ses cordoli, tar in inscunter cun las medias a Berna.
Gronda condolaziun sin tut il mund
Tenor il secretari general da l'ONU, Antonio Guterres, saja la Queen vegnida admirada sin l'entir mund per sia grazia, sia dignitad e sia premura. Il primminister dal Canada Justin Trudeau ha accentuà la savida, la cumpassiun e la cordialitad da la Queen.
Reacziuns sin la mort da Queen Elizabeth II.
-
Bild 1 von 6. La Queen vegnia a restar en memoria sco dunna cun gronda forza ed ina direcziun stabla, scriva Ignazio Cassis sin Twitter. Bildquelle: Keystone / RTR.
-
Bild 2 von 6. «Ella (la Queen) era ina buna amia da las Naziuns Unidas ed ina preschientscha calmanta durant decennis plain midadas», scriva il secretari general da las Naziuns Unidas. Bildquelle: Keystone / RTR.
-
Bild 3 von 6. La reacziun da la ministra da l'exteriur da la Germania, Annalena Baerbock. Bildquelle: Keystone / RTR.
-
Bild 4 von 6. «Queen Elizabeth II era il crap sin quel ch'ins ha construì la Gronda Britannia moderna». Cun quests pleds condolescha la nova primministra da la Gronda Britannia, Liz Truss. Bildquelle: Keystone / RTR.
-
Bild 5 von 6. La reacziun da Joe Biden, president dals Stadis Unids: . «Queen Elizabeth II era ina dunna dal stadi cun ina dignitad e constanza nuncuntanschida, ch’era ina part impurtanta dal fundament per l’allianza tranter il Reginavel Unì ed ils Stadis Unids. Ella ha gidà da far speziala nossa relaziun.». Bildquelle: Keystone / RTR.
-
Bild 6 von 6. Emmanuel Macron, il primminister da la Frantscha scriva, che la Queen saja stada l'incorporaziun da la Gronda Britannia. Bildquelle: Keystone / RTR.