Il cumenzament da l'emna è stà in zic pli ruassaivel. Pli pauca glieud è pelegrinada avant il palaz, uschia hai dà pli paucas colonnas. Per che tuts chattian er adina la via gidan numerusas voluntarias e voluntaris. Els mussan la via e respundan dumondas da tut il gener.
La fin d'emna suenter la mort cun gronda truscha
Tgi che vul vegnir enfin avant il Buckingham Palace sto u far quai baud la damaun ubain spetgar ditg. Las colonnas èn lungas durant il di, fitg bleras persunas da Londra ma er d'ordaifer èn da viadi cun in puschel flurs per mussar il respect a la Queen. En las grondas fullas èsi pussaivel ch'ins vegn strusch vinavant ubain vesa pauc u nagut da las ceremonias, la musica ubain autras festivitads che succedan. L'atmosfera e calma e paschaivla.
Las flurs che vegnan plazzadas avant il Buckingham Palace restan là 12 uras, suenter vegnan ellas transportadas en in lieu al Green Park.
Tgi che venda quels dis fluras fa ina buna fatschenta. Uschia han divers shops da souvenirs da nov fluras en il sortiment, er bandieras ed auters objects cun si la regina vegnan davent bain. Il stan da souvenirs avant il Green Park ha tut a dubel da far.