L'areal enturn il Buckingham Palace è stà plain gia durant il mardi, tschientmillis persunas han spetgà là sin l'arrivada dal vaschè da la Queen. Er auters lieus sco il Green Park ubain il Hyde Park èn stads fullanads, er a l'ur da las vias han visitadras e visitaders spetgà, quai malgrà plievgia.
En lingia per pudair ir en la Westminster Hall
Emprimas persunas èn gia sa postadas il glindesdi en la vischinanza dal palast da Westminster per esser ils emprims en la colonna. I sa tracta dentant be dad ina pitschna gruppa. A partir da mesemna a las 14:00 èsi pussaivel da far visita en la Westminster Hall e prender cumià da la regina Elizabeth II. Enfin lura vegn la colonna per prender cumià da la Queen a crescher fitg.
![Phil tegna ina gasetta sper a la Themsa a Westminster](https://www.rtr.ch/static/cms/images/960w/080c84.jpg)
Phil ch'è oriund da l'Australia e viva dapi 38 onns ordaifer da Londra ha cumenzar cun star en colonna gia il mardi, pia passa 24 uras avant che la publicitad po visitar il vaschè. Cun el ha el priu gasettas, sandwiches ed in parisol. Phil è in grond roialist ed era gia stà a visitar il vaschè da la Queen Mum.
Processiun cun il vaschè fin al Westminster Palace
Mesemna suentermezdi vegni a dar ina processiun festiva cura ch'il vaschè vegn transportà dal Buckinham Palace en la Westminster Hall. Il vaschè da la Queen vegn tratg sin in char da chavals, a la testa da la processiun vegn il retg Charles ad esser. Da las 14:22 (temp local a Londra) cumenza la processiun davent dal Buckingham Palace.
Millis da schuldada hajan exercità la notg passada a Londra questa processiun. Numerusas vias èn stadas serradas.
BBC mussa livestream da la bara da la Queen
L'emettur dal dretg public britannic, BBC mussa durant prest 110 uras via livestream la bara da la Queen en il parlament a Londra. Questa purschida sa drizzia a tuttas persunas dal mund che veglian mussar lur respect a la Queen, ma na pon betg viagiar a Londra, u n'han betg la pussaivladad da star en colonna, ha scrit l'emettur. I vegn quintà cun temps da spetga da prest 30 uras. Il livestream duai cumenzar questa saira a las 6 e cuzzar fin glindesdi bun'ura las 7e mesa.