Ils proxims pass - Co vai vinavant suenter la mort da la Queen?
«London Bridge is down» – per rumantsch: «La punt da Londra è crudada ensemen». Cun questa frasa ha il secretari privat da la Queen infurmà la primministra, che Elizabeth II saja morta. Tenor infurmaziuns da l’Associaziun da medias da l'ester en Gronda Britannia èn quai ils proxims pass.
Legenda:
Queen Elizabeth II è morta ils 8 da settember en la vegliadetgna da 96 onns.
MAD
Di da la mort
La primministra vegn infurmada davart la mort da la Queen. La primministra u il primminister tegna sco emprim ina decleraziun uffiziala.
Ils auters ministers vegnan infurmads, dentant via mail. Il pli tard 10 minutas suenter avair annunzià la mort, vegnan las bandieras messas a mesa asta. Tar il Buckingham Palace vegn pendì or ina communicaziun uffiziala.
Legenda:
«La Queen è morta»:
La communicaziun uffiziala vi dal portal dal Buckingham Palace.
Keystone
Il ministeri da l'exteriur infurmescha las regenzas dad auters stadis davart la mort da la Queen. Ils parlaments da la Britannia sco er ils parlaments da la Scozia, da l'Irlanda dal Nord e da la Valisa vegnan spustads.
La famiglia roiala vegn a publitgar ils plans per il funeral. Quel vegn ad esser probablamain 10 dis suenter la mort.
Successur dad Elizabeth II. vegn ad esser il figl il pli vegl, prinzi Charles. Er ses num sco retg è gia enconuschent: King Charles III.
Emprim di suenter la mort
In cussegl vegn ensemen e proclamescha il proxim retg. Il parlament vegn ensemen per deliberar ina decleraziun da condolenza. Tut las lavurs parlamentarias vegnan messas da la vart per 10 dis.
A las 15:30 inscuntran la primministra ed il cabinet il nov retg da la Gronda Britannia.
Legenda:
Prinzi Charles vegn ad esser il successur da la Queen.
Keystone
Ils proxims dis
Il nov retg vegn ad acceptar la dumonda da condolenza. Suenter vegn el ad ir sin in viadi da cordoli. Quest viadi maina el en la Scozia, l'Irlanda dal Nord ed en la Valisa. Durant il viadi vegn el a far part a plirs servetschs divins.
En il fratemp vegn il vaschè da la Queen manà a Londra. Là datti pliras emprovas per la processiun e per il funeral statal.
Il vaschè da la Queen vegn mess en bara. 100'000 persunas vegnan spetgadas per render la davosa onur ad Elizabeth II.
10avel di suenter la mort
Il dieschavel di suenter la mort ha lieu in Di da cordoli naziunal. En la Westminster Abbey ha lieu il funeral statal. En tut il pajais vegni a dar minutas da silenzi. La regina vegn enterrada tar il chasti Windsor en la «Memorial Chapel», sper ses bab.
Il maletg da la Queen vegn pendì si en tut las chasas municipalas. Suenter in mais vegn questa fotografia remplazzada dad ina fotografia dal nov retg, King Charles III.
