Claudio Simonet è naschì ils 14 d'avrigl 1954 a Mumpé Medel sco segund da sis uffants da Leci e Rosa Catrina Simonet-Flepp. La scola populara ha el frequentà a Mumpé Medel, ina scola cumplessiva. En la quarta e tschintgavla classa ha el magari stuì siglir en per dar scola cunquai ch'il magister fascheva dasperas anc il pur. Probabel ha quai intimà Claudio da vulair far pli tard il seminari. Davent da la sisavla classa ha el lura gì instrucziun da clavazin.
Per la scola secundara han ils uffants da Mumpé Medel stuì ir a Mustér. E là ha Claudio survegnì impressiuns musicalas entras l'organist pader Anselm sco er il chor viril (chor baselgia) ed il chor d'uffants da Mustér. In mument fitg decisiv saja stà per el in concert dal chor d'uffants Mustér e dal chor viril Mustér ensemen cun il tenor Renato Premoli (oriund da Ziràn).
Ernst Schweri e Gion Antoni Derungs
Al seminari da magisters a Cuira ha Claudio Simonet emprendì d'enconuscher duas persunalitads che han influenzà fermamain ses svilup musical: En la sparta chant e pedagogia da chant il professer Ernst Schweri (per Claudio Simonet in «meister-dirigent») e sin clavazin ed orgla il cumponist Gion Antoni Derungs. L'instrucziun tar quels dus magisters han lura motivà Claudio Simonet da far in studi da musica. Entras Ernst Schweri ch'enconuscheva fitg bain il manader dal conservatori a Winterthur, Willi Gohl, è il giuven scolast sa decidì da far là il studi. Sco rom principal ha el prendì l'orgla e dasper anc chant solo.
Altstätten SG
Avant che cumenzar il studi ha Claudio Simonet fatg la recruta tar la musica militara. En il militar è el s'avanzà al dirigent ed ha uschia manà musicas da regiment e battagliun. En la sparta musica instrumentala ha el pudì profitar da la savida dad Albert Benz. L'instructur e pli tard inspectur da las musicas militaras ha pudì scolar Claudio Simonet en teoria, arranschament e cumposiziun. Durant il temp da militer ha Claudio Simonet era emprendì d'enconuscher il chantadur surmiran Gion Jäger. Cun lez ha el pli tard lura chantà en la furmaziun «Ils Trais Baritons Grischuns».
Suenter avair terminà il studi a Winterthur ha Claudio Simonet chattà ina plazza sco organist e dirigent ad Alstätten SG. Fatg attent el sin questa plazza aveva ses anteriur scolast al seminari Gion Antoni Derungs. Ad Altstätten ha el pudì far fitg impurtantas experientschas musicalas. En questa regiun ha el er adina puspè gì da far cun Mario Schwarz e ses frar Albert. Els enconuscheva el gia da pli baud.
Sper sia occupaziun ad Alstätten ha Claudio Simonet er instruì clavazin a la scola da musica Surselva ch'era vegnida fundada il 1973. Vitiers ha el dirigì il chor da ses vitg natal, la Cantoreia Mumpé Medel. Per il chor maschadà ha el scrit simplas chanzuns cun texts da sia onda Ottilia Albin. Entant aveva Claudio Simonet maridà Anastasia Lutz da Curaglia ed il medem onn cura ch'il figl Simon è naschì (1984) è vegnida scrit ora en Surselva la plazza da manader da la scola da musica.
Manader scola da musica Surselva
Claudio Simonet ha survegnì la plazza ed uschia è la giuvna famiglia returnada en Surselva nua che Claudio Simonet ha manà la scola da musica durant 34 onns fin sia pensiun. Il post era dentant al cumenzament be in pensum parzial (20%) uschia ch'el ha vinavant instruì clavazin ed orgla ed ha era surpiglià autras funcziuns ordaifer la scola da musica. Uschia ha el per exempel dirigì il «Chor mischedau Surselva» (oz «Chor Surselva»). Cun quel ha el pudì realisar grondas ovras sco per exempel il requiem da Gion Antoni Derungs per chor, solists ed orchester.
Ensemen cun ils musicists e scolasts da musica a la scola da musica Surselva Marius Fry ed Armin Caduff ha Claudio Simonet fundà ils onns 1980 la fatschenta da musica Frisica. En connex cun quest engaschi ha el era frequentà in curs d'accordar clavazins. Cun ils onns è il dumber da scolaras e scolars a la scola da musica vegnì pli e pli grond ed il pensum da manader da la scola da musica è perquai vegnì augmentà pass per pass. Tuttenina era l'occupaziun talmain gronda che Claudio Simonet ha stuì sa distatgar da la fatschenta da musica Frisica.
Per la scola da musica Surselva ha Claudio Simonet er edì cudeschs d'instrucziun. Uschia ha el fatg ensemen cun las scolastas da flauta Fina Blumenthal e Nelly Moder in med didactic «Curs elementar per flauta» ed ensemen cun Gion Gieri Tuor in med didactic per instruments da sturs.
Rom: Chant solo
Ils onns 1980 han ils chantadurs Armin Caduff e Gion Jäger fatg ina scolaziun da vusch en l'Italia. Cunquai che Armin Caduff era scolast a la Scola da musica Surselva ha Claudio Simonet sco manader introducì il rom «chant solo». Aifer curt mument ha quai gì in grond success. Ordlonder hai dà il «Rudi da cant» da la Scola da musica Surselva (dir. Armin Caduff), ina purschida da chant solo. Pli tard è naschì or da quest rudè da chant il chor d'uffants Surselva ch'exista anc oz. In'autra furmaziun ch'è sa sviluppada or da las classas da chant è «Krambambuli», ina furmaziun da giuvnas chantaduras.
Per questa furmaziun ha Claudio Simonet er arranschà bleras ovras. El scriva sez chanzuns, per la gronda part dentant or dal basegn dad avair litteratura per ses chors e betg exnum per publitgar. In zic è el era losch dad esser parent cun il cumponist Gion Balzer Casanova (cusrin da la mamma da Claudio Simonet).
Era Claudio Simonet ha prendì uras da chant tar Armin Caduff ed è daventà bariton. Sco solist ha el pudì surpigliar rollas en projects d'opera («Nabucco» ed «Ernani») nua che la Compagnia Rossini (furmaziun da chant da Armin Caduff) è era stada da la partida. Anc oz è Claudio Simonet commember stabel da la «Compagnia Rossini».
In'autra furmaziun nua che Claudio Simonet è stà commember è «Ils Trais Baritons Grischuns» cun Gion Jäger e Claudio Danuser. Cun il trio ha el pudì festivar intgins success a chaschun da concerts. Deplorablamain è Gion Jäger vegnì malsaun e lura mort il 2018. Quai è era stada la fin dal trio da baritons.
Caracteristic per Claudio Simonet è ses esser generalist. El ha adina gì tschient e milli chaussas en ina, betg mo en il mund da la musica (organist, pianist, chantadur, dirigent, cumponist). El fotografescha era gugent, scriva gugent ed è il mument er il president communal da la vischnanca Medel.
Claudio Simonet en emissiuns da RTR:
Artg musical
Ura culturala
