Respect, energia positiva e plaschair da realisar insatge ensemen – quai èn las valurs principalas ch'Esther Hendry aveva fixà avant 25 onns en il mussavia dals Movis. Quellas valurs restian er en l'avegnir. «Nossas mussadras han chapì da dar vinavant quest messadi, ma surtut er il plaschair da sa mover», uschia Esther Hendry.
25 onns Movis – in sguard en noss archiv
L’onn 2000 aveva la giuvna dunna e mamma d'Alina e Valeria resentì il desideri da porscher ina sort activitad cun musica e saut per uffants. Sin basa da quest'idea è naschì in concept da success ch'è sa sviluppà ad ina vaira instituziun per uffants e creschids en la Cadi.
Ils Movis èn naschids da mes plaschair per saut e moviment – ma era da mia creativitad.
L’emprima fin d’emna d’avrigl celebreschan ils Movis – che tutgan tar l’Uniun da gimnastica Cadi – lur giubileum da 25 onns. A chaschun da questa festa, sut il motto «Semova», vegn Esther Hendry a surdar uffizialmain il timun a sias successuras. «Jau hai duvrà temp per dar a mamezza glisch verda per laschar dar», conceda Esther Hendry. Ussa saja ella dentant fitg cuntenta da pudair surdar a quatter dunnas giuvnas cun novas forzas ed anim da dar vinavant il fieu per saut e moviment.
-
Bild 1 von 3. Movis: 25 onns saut cun cor ed olma. Bildquelle: movis.
-
Bild 2 von 3. Esther Hendry Decurtins sa legra sin novas sfidas en la vita. La magistra da scola primara cumbinescha gugent moviment, saut, musica e teater. Bildquelle: Esther Hendry.
-
Bild 3 von 3. Dar vinavant il plaschair da sautar ha bleras furmas. Esther Hendry dat zacons tips a sias giuvnas scolaras da «mini- movis». Bildquelle: RTR.
Cun RTR guarda Esther Hendry enavos sin l’activitad dals davos 25 onns, ma era sin las midadas ch'ella ha constatà tar il svilup dals uffants, tar lecziuns da saut ed er en scola. Da sfidas en sia professiun sco magistra, davart la passiun per il saut, ils siemis e l’amur per la vita sco era per ses concarstgaun ans raschuna Esther Hendry en il Profil.