Buna atmosfera, la pli diversa musica per cor ed ureglias ed ina bella culissa a mez la natira. Tut quai porschan ils festivals ed open airs ch'han lieu durant la stad en las pli differentas regiuns dal Grischun. Durant la stad ha RTR rapportà regularmain d'intginas da questas occurrenzas cun emissiuns live, fotografias e contribuziuns.
Survista cumpacta dals open airs e festivals en il Grischun / Übersicht der Festivals und Openairs in Graubünden
| datum | festival | lieu |
|---|---|---|
| 17 enfin ils 20 d'avrigl | SunIce Festival | San Murezzan |
| 27 enfin ils 29 da zecladur | Openair Cavaglia | Cavaglia, Poschiavo |
| 3 enfin ils 27 da fanadur | Festival da Jazz | San Murezzan |
| 11 enfin ils 13 da fanadur | Openair Rheinwald | Valragn |
| 18 enfin ils 20 da fanadur | Openair Safiental | Val Stussavgia |
| 24 enfin 26 da fanadur | Openair Bivio | Beiva |
| 24 enfin ils 27 da fanadur | Openair Lumnezia | Degen |
| prim enfin ils 3 d'avust | Chapella Open Air | tranter S-chanf e Brail |
| prim enfin ils 3 d'avust | Rapid Open Air | Panaduz |
| 8 enfin 10 d'avust | fids | Churwalden |
| 8 e 9 d'avust | ROCKseDRUN | Sedrun |
| 15 e 16 d'avust | Openair Malans | Malans |
| 29 e 30 d'avust | Indoor Sounds Disentis | Mustér |
| Arcas Rock | Cuira | |
| pir puspè il 2026 | Bergfahrtfestival | Bravuogn |
Ordaifer il Grischun ma cun connex rumantsch è questa stad per l'emprima giada il «Festivalet» a Turitg.
| 20 e 21 da zercladur | Festivalet | Turitg |
Differentas autras occurrenzas e festas culturalas chattais Vus sin: www.chalender.ch.
17-20 d'avrigl: SunIce Festival
La stagiun da festivals cumenza gia l'avrigl a San Murezzan. Dapi il 2022 datti il SunIce Festival cun musica electronica a la fin da la stagiun d'enviern en il territori da la Corviglia.
20 e 21 da zercladur: Festivalet a Turitg
Il Festivalet è l'emprim festival cultural rumantsch en la Svizra tudestga. Sper concerts cun musicistas e musicists da la scena rumantscha datti er prelecziuns, poetry slam, program d'uffants e culinarica. Lieu ha l'occurrenza culturala en il club X-TRA e la Johanneskirche a Turitg.
27-29 da zercladur: Openair Cavaglia
L'Openair Cavaglia porscha mintga onn durant trais dis in mix da concerts da tut il gener sco er ateliers. Sper quai pon ins er giudair la natira en la Val Poschiavo. Tgi che sa preschenta al Openair Cavaglia 2025 n'è anc betg enconuschent.
3-27 da fanadur: Festival da Jazz St. Moritz
Durant in entir mais s’inscuntra la scena da jazz ed artistas ed artists d’auters geners en divers locals a San Murezzan. Il festival porscha per regla er jazz sut tschiel avert e culissa da natira impressiunanta.
11-13 da fanadur: Openair Rheinwald
Dapi passa 30 onns ha il festival lieu en il guaud nair sper Nufenen. Suenter trais decennis ha l'Openair Rheinwald gia status da cult en la regiun ed attira mintga onn persunas indigenas e giasts da vacanzas. Il program da l'ediziun 2025 n'è anc betg enconuschent.
18-20 da fanadur: Openair Safiental
Amez culms, guaud e dutgs alpins – quai è il pitschen festival en la Stussavgia. Dapi il 2000 datti l'openair che metta pais sin esser persistent, saja quai cun porscher spaisas indigenas e construir l'infrastructura da festival or da lenn. Sin il palc vegnan er gruppas e musicistas e musicists pli pauc enconuschents.
24 enfin 26 da fanadur: Openair Bivio
Sin 1'900 meters sur mar ha l'open air lieu sut il motto «Vesair, sentir ed udir». Sper giudair buna cumpagnia e musica sin il palc porscha l'Openair Bivio er ina culissa muntagnarda unica^.
24-27 da fanadur: Open Air Lumnezia
Dals 25 fin ils 27 da fanadur rampluna puspè la tribuna a Degen a l’Open Air Lumnezia. L'openair il pli grond en il Grischun attira persunas indigenas sco er da l'entira Svizra – en tut radund
1-3 d'avust: Chapella Open Air
Il festival en l’Engiadina è gia vegnì numnà il «Woodstock» en il Grischun ed è in festival ch’è era bain adattà per famiglias. A l'Open Air Chappella, tranter S-chanf e Brail pon ins s'incuntrar e tadlar musica amez e giudair l'atmosfera muntagnarda e calma. Il program musical dal 2025 da l'openair en Engiadin'Ota n'è anc betg enconuschent.
1-2 d'avust: Rapid Openair
Al cumenzament era in vehichel da rapid il palc da l'open air – perquai era il num dal festival. Uss è quai betg pli il cas, dentant èn divers rapids en acziun per transportar chaussas sin l'areal da l'open air. L'open air pitschen a Panaduz datti dapi il 2021 ed el è il successur da l'Openair Hohen Rätien a Seglias en Tumleastga. Tgi che stat questa stad sin il palc n'è anc betg enconuschent.
8-9 d'avust: ROCKseDRUN
Gia otg giadas hai dà sisum la Surselva a Sedrun il ROCKseDRUN. Il festival porscha ina fin d'emna da musica e quai cun entrada gratuita. Tge che suna e chanta l'avust 2025 a Sedrun n'è anc betg enconuschent.
8-10 d'avust: fids
Fids – ubain «Fescht in da Staina» è il festival a Churwalden e porscha differentas activitads sper la tribuna. Tgi che suna sin il palc il 2025 n'è anc betg enconuschent.
15 e 16 d'avust: Open Air Malans
En il vitg da vin Malans vegn organisà mintga stad in festival. Per regla èsi surtut d'udir musica svizra al Open Air Malans. L'open air ha lieu sin il prà tranter Malans e Landquart che vegn numnà «Schanz Tratt».
29 e 30 d'avust: Indoor Sounds Disentis
Cun in nov num ed in nov datum datti il 2025 enstagl dal Indoor Festival l'Indoor Sounds a Mustér. Usitadamain aveva il festival lieu il matg, ils organisaturs han decis da spustar l'occurenza sin la fin avust.
settember: Arcas Rock
Amez la citad veglia da Cuira sin in dals pli enconuschents plazs è mintgamai l'Arcas Rock. Sin la tribuna sa preschentan musicistas e musicists indigens, dentant er d'ordaifer il Grischun. Tgi che suna il 2025 sin la tribuna n'è anc betg enconuschent.
