Atgnamain avess il «Rocksedrun» pudì festivar quest onn il giubileum da 10 onns. Cunquai che duas ediziuns n’han betg pudì vegnir fatgas, è stada l’otgavla ediziun dal festival da musica sisum la Surselva. L’aura ha constà ed uschia han tenor communicaziun dals responsabels passa 1’000 persunas chattà la via en Tujetsch durant ils dus dis. Surtut la sonda è stada la sentupada da las amaturas da la musica rumantscha e da las indigenas ed indigens.
Il festival vul restar gratuit e cun musica rumantscha
«Sur tut quels onns è il Rocksedrun in'occurrenza senza ch’ins sto pajar entrada. Quai vulain nus era mantegnair vinavant, la glieud duai pudair vegnir e giudair la cumpagnia cun l’entira famiglia ed ins na sto era betg consumar insatge», di la cassiera da l’uniun Elvira Deplazes. Els possian surtut profitar da fitg buns e fidaivels sponsurs, quai dettia ina garanzia e segirtad da pudair cuntinuar cun quest concept, declera ella. Cumenzà ha tut cun ina pitschna grillada cun musica e sa sviluppà è quai tar ina occurrenza per giuven e vegl. Era la maschaida tranter persunas cun ina abitaziun en la regiun e persunas indigenas è sa cumprovada. Uschia è l’atmosfera a Sedrun ina fitg famigliara e la tempra è sco tar ina festa dal vitg. Tuttina veglian els porscher, surtut il venderdi, musica moderna ed attractiva e la sonda musica rumantscha. Quai vegnia era a restar vinavant uschia, declera la responsabla per las medias e grafica Ursina Vinzens.
Confusiun da termins, betg in problem
Il Rocksedrun è in'occurrenza en il liber e Sedrun è situà sin 1’400 meters sur mar. Uschia saja la data gia quasi dada, pertge pli tard l’avust possia l’aura gia far in stritg tras il quint e la fin d’emna avant il cumenzament da scola saja sa cumprovada. Las persunas che veglian vegnir a Sedrun vegnian, era sche quai ha il medem di festas a Glion e Cuira, di Elvira Deplazes. Uschia è gia planisada la proxima ediziun, quella vegn ad esser ils 8 ed ils 9 d’avust 2025, puspè il venderdi e la sonda e puspè cun blera musica rumantscha.
