Siglir tar il cuntegn

Header

video
Aftermovie @ Open Air Lumnezia 2024
Or da Musica dals 28.07.2024.
Maletg: RTR laschar ir. Durada: 7 minutas 12 Secundas.
  1. Cultura
  2. Festivals

cuntegn

Open Air Lumnezia 2024 La festa è gia puspè a fin

La 38avla ediziun ha da bellezza aura purschì 21 acts repartids sin trais dis da festa. Il comité d’organisaziun, visitaders e visitadras fan in facit positiv. La proxima ediziun datti ils 24 fin ils 26 da fanadur 2025.

Autor: 

28.07.2024, 14:58

Parter
audio
Open Air Lumnezia 2024: la bilantscha cun il schef Norbert Cavegn
ord Actualitad dals 26.07.2024. Maletg: RTR
laschar ir. Durada: 5 minutas 54 Secundas.

Sco mintg’onn han blers vulì esser ils emprims sin l’areal per survegnir la meglra plazza per la tenda. Gia la saira avant èn intgins visitaders passiunads vegnids per segir esser baud sin l’areal, auters han vulì extender il temp avant lieu e perquai fatg il medem. Dentant han ellas ed els stuì pernottar avant l’areal da l’openair en tenda u il busin.

audio
Open Air Lumnezia 2024: Trais lungs dis da festa, resumads èn tuns e pleds
ord Actualitad dals 26.07.2024. Maletg: RTR
laschar ir. Durada: 4 minutas 26 Secundas.

Il program da quest onn haja survegnì critica, dentant sajan els cuntents cun las decisiuns. Bleras bands hajan pudì persvader – ha ditg il president dal comité d'organisaziun Norbert Cavegn envers RTR. La 38avla ediziun dal festival da musica sut tschiel avert ha carmalà 17'700 persunas da gievgia fin sonda a Degen. Sco gia l'onn passà n'è l'openair cun quai er quest onn betg stà vendì ora dal tuttafatg. Bain inqual osp ha tuttina chattà la via en nossa gondla sin l’areal da festa per far ina visita en la box da fotografias.

Ch'i n'è betg stà tants visitaders e visitadras sco auters onns ha era percurschì l’equipa che fa urden suenter l'openair. Ed era la bel'aura ha levgià la lavur. En tut èn radund 40 persunas stadas engaschadas per il rument durant la festa – ed igl ha dà radund 20 tonnas durant quels quatter dis.

audio
Open Air Lumnezia 2024: Suenter la festa vegn fatg urden
ord Actualitad dals 29.07.2024. Maletg: RTR
laschar ir. Durada: 3 minutas 47 Secundas.

Musicalmain ha spetgà ina purschida per prest tut ils gusts e las preferenzas da musica: quai da rock, rap e heavy metal sur trip-hop, dance e musica electronica e da festa –  da tuns miaivels fin sound dir. La gievgia ha persvas cun in bun start. ANIKK per l’emprima giada sin la tribuna gronda ha mussà ina show professiunala e gia baud pudì carmalar in vast public. Cun las duas gruppas Querbeat e la Stubete Gäng hai dà in final energetic che ha pretendì tut da las visitadras e dals visitaders.

Adattà al tema

Il venderdi ha cumenzà cun ina scuvrida musicala. La gruppa Rooftop Sailors da Berna è vegnida per remplazzar la band englaisa Frank Carter and the Rattlesnakes. Quella largia han ils Bernais emplenì senza problems ed intgantà il public davant tribuna. Tar autas temperaturas hai vinavant dà heavy metal da la chantadura Seraina Telli ed in dals highlights da la fin d’emna cun la rapcrew tudestga 01099. In public uschè segir dals texts hai anc darar dà a l’Open Air Lumnezia. Il DJ Alle Farben ed il rapper Kontra K han procurà per ina buna finiziun dal di.

Adattà al tema

Era il di final ha cumenzà cun autas temperaturas ed ina surpraisa musicala. La giuvna band Crown sa preschenta pir dapi curt a concerts, e tuttina han ils musicists preschentà lur rock en il stil dals onns 60 e 70 sco schi fissan gia vulps veglias. Era il victur dal «Game for Fame» Kai Bonzai ha nizzegià a moda suverana sias tschintg minutas sin la tribuna gronda. Il suentermezdi è lura sa preschentà fitg variant cun rap da Gigi, 80s pop da Valentino Vivace ed il pop actual da la chantautura Dana. Cun la gruppa Enter Shikari ed il «Schlagerrapper» Tream hai anc ina giada dà energia e chalira a Degen – malgrà in curt pluschignim sin l’areal. L’Australiana Tones And I pareva a l’entschatta dad avair in zic problems da svegliar il public, dentant pli ditg ch’il concert gieva e pli fitg èsi grategià. Cun Faithless Live ha il public lura anc pudì sautar viaden en la notg.

Adattà al tema

RTR ha rapportà da tut ils trais dis en il radio, via livestream e cun diversas contribuziuns online ed en las raits socialas. Tut ils videos da quels dis pudais guardar en ruaus en il Play RTR. Tuts ils concerts chattais qua:

Ils concerts da l'Open Air Lumnezia 2024 a Degen

Cun vus e per vus essan nus era stads davos las culissas, amez las tendas e dapertut tranteren. En la proxima gallaria da videos pudais tadlar co la glieud al festival chanta unics, co la rapcrew 01099 vilenta nossa redactura Ronja ubain co il moderatur engiadinais Elias Tsoutsaios scuvra in fenomen da l’Open Air Lumnezia – ed anc bler dapli!

RTR actualitad 17:00

Dapli dal tema

  1. Cultura
  2. Festivals

Artitgels legids il pli savens

Menu

Tschertga

Navigaziun principala

Enquista en Modal

(Vegn avert en ina nova fanestra.)