Igl è ina sort puntanada d'atschal filigrana da 40 meters autezza che vegn enzugliada da bindels da taila da colur verd turchis. Il Katharinen-Turm s'auza vers il tschiel da Turitg fin ils 10 da december 2024. E quai en in lieu remartgabel. Là, nua ch'igl è vegnì scrit istorgia da refurmaziun e nua che la segunda tur dal Fraumünster steva fin il 18avel tschientaner.
La tur è da caracter simbolic: ella duai – uschia scrivan las iniziantas dal project – «manifestar l'impurtanza da las dunnas che han gidà a sviluppar Turitg sin nivel economic, politic e social e che gidan a crear e furmar la citad fin oz».
500 nums da talas dunnas engaschadas èn stampads sin ils bindels da taila: per exempel quel da l'interprendidra e cumbattanta per ils dretgs da las dunnas Verena Conzett ubain quel da l'anteriura presidenta dal cussegl sinodal Franziska Driessen-Reding. Ma er ils nums da dunnas grischunas cun influenza a Turitg èn da leger sin la taila, per exempel il num da la pacifista e feminista Clara Ragaz u da la reverenda Cornelia Camichel-Bromeis. Sin la pagina d'internet dal project pon ins far ulteriuras propostas da nums che mancan anc.
Il fundament transibel da la tur è deditgà a las 29 abadessas che han manà il Fraumünster fin l'onn 1524. Las benedictinas han gì sur tschientaners ina gronda responsabladad politica a Turitg – fin che l'ultima abadessa, Katharina von Zimmern, ha surdà l'onn 1524 las clavs al cussegl da la citad. Uschia ha ella pussibilità la refurmaziun turitgaisa senza sponder sang. Il Katharinen-Turm porta il num da la davosa abadessa dal Fraumünster ed è in mussament che l'istorgia da la refurmaziun è er l'istorgia da las dunnas.
