Exodus – u co che Chatrina Gaudenz fa punts cun musica e poesia

Cumenzà ha tut sin il Züriberg. Là s’inscuntran mintga mesemna umans fugitivs per in curs da tudestg en la plaiv Fluntern. Il curs maina la reverenda Chatrina Gaudenz, oriunda da Lavin. Ina mesemna spetga ella las participantas ed ils participants – els na sajan betg adina punctuals. Per far passar il temp s’approfundescha ella en in’ovra scientifica davart il tema da l’exodus – ed en quel mument vegn ella salidada dad in um african. Quai saja stà il mument, raquinta Chatrina Gaudenz en «Vita e cretta», ch’ella haja savì: quest inscunter è la partenza per in project musical. La fin dals quints n’haja betg mo dà ina sairada poetic-musicala, ma perfin in film che documentescha co che las istorgias da persunas fugitivas vegnan reunidas cun cumposiziuns da giuvens cumponists e da giuvnas cumponistas ad in project cuminaivel.