La mort è part da la vita – part da la societad?

L’uman en il process da cumià, en il temp da cordoli ed encreschadetgna avant e suenter la mort d’ina persuna amada èn tema en l’emissiun «Vita e Cretta» da questa dumengia. Dumondas da vita e mort, il process da cordoli ma er il servetsch en autras situaziuns difficilas da la vita tutgan tar il mintgadi da Marlis Flepp. Cun sia agentura «beFRIEDEN» porscha la dunna oriunda da Trun cussegliaziun ed agid, ma era referats e lavuratoris tar dumondas en connex cun vita e mort. En l’emissiun «Vita e Cretta» tematisescha Marlis Flepp las midadas dal process da cumià, ma era da situaziuns sensiblas da la vita, cun las qualas l’uman po vegnir confruntà. Marlis Flepp conceda ch’igl è mintgatant difficil da chattar ils dretgs pleds, dentant: «Quai ch’ins fa e di cun il cor, po sulettamain esser bun».