Correctiv Svizra è ina rait da retschertga collectiva d’util public. Correctiv rinforza la democrazia cun retschertgar temas ensemen cun la populaziun. La populaziun duai esser part da la retschertga e betg be survegnir servì artitgels finids. Correctiv scuvra situaziuns insupportablas e s’engascha per in schurnalissem investigativ.
Dischinfurmaziuns hai gia adina dà. Ma cun las medias socialas e cun l’internet vegnin nus dapi insaquants onns inundads cun dischinfurmaziuns. I va per far daners, cugliunar, dschinfurmar, derasar odi ed auter. «La dischinfurmaziun en Svizra n’è betg pli gronda ch’en auters pajais. Ma dapi la guerra en l’Ucraina e la pandemia da corona è la dischinfurmaziun creschida en Svizra.», di Sven Niederhäuser. Dischinfurmaziun po reducir la confidenza en instituziuns, influenzar la furmaziun dad opiniuns e cunquai la libra decisiun. Per ch’ina democrazia restia sauna e funcziunia è ella dependenta d’ina populaziun bain infurmada e d’in schurnalissem che s’orientescha a la vardad. «Las bleras partidas stattan davos la democrazia. L’idea da quellas persunas che derasan dischinfurmaziuns è da cumbatter la democrazia.»
Il mument è Correctiv Svizra anc vi da colliar ina rait da schurnalistas e schurnalists locals. L’idea è ch’il schurnalissem local duaja pudair realisar retschertgas grondas ensemen cun Correctiv per uschia crear publicaziuns ch’han ina relevanza speziala per la populaziun al lieu. Cun ses model vul Correctiv render accessibel gratuitamain in schurnalissem investigativ per tuttas e tuts. Correctiv s’orientescha al bainstar public. L’instituziun sa finanziescha cun donaziuns.
