Aromas sco rascha, lain u mistgel – quai èn ils aromas da la cuschina da Rebecca Clopath da Lon. Cun tratgas cumponidas da vivondas ch'ella producescha sin ses bain puril da bio e che creschan en ses conturn muntagnard delectescha Rebecca Clopath ses giasts.
Sin ils plats inschignusamain preparads vegnan ervas alpinas, legums e pumaraida selvadia. E quai en cumposiziuns surprendentas. En nov tratgas porschan Rebecca Clopath e ses team uschenumnadas percepziuns da mangiativas, pia pasts che cuzzan radund 5 uras. Accumpagnadas vegnan las tratgas d'explicaziuns, raquints ubain era da poesias. Quai saja in'aventura culinarica per tut ils senns, èsi da leger sin la pagina da web da Rebecca Clopath.
Tge aromas e gusts han il potenzial da fascinar l'anteriura cuschiniera da gourmet e pura sutsilvana sezza? Sco gustass la vita da Rebecca Clopath sch'ella fiss ina vivonda? Ed or da tge motivs deditgesch'ella sia via professiunala e sia amur als gusts da la natira? Quellas ed autras dumondas respunda Rebecca Clopath a Vita e cretta sin ina spassegiada filosofica – tschertgond ervas interessantas er en la citad da Cuira.
