Da vulair planisar la vita d'insatgi auter n'è betg ina buna idea, manegia Nicolas Zogg. El scusseglia perquai a mintga genitur da vulair far quai cun ses uffant. «Nus dain a noss uffants la pussaivladad da pudair utilisar uschè bain sco pussibel lur tratgs caracteristics , sco era impurtantas valurs ed abilitads ch'i dovra per sa sviluppar e funcziunar en questa societad», di il coach da babs. «Il rest è dentant a partir d'ina tscherta vegliadetgna la responsabladad e la via da l'uffant.» Ils geniturs accumpognan bain lur uffants sin questa via , lur rolla vegnia dentant adina pli pauc impurtanta. «Sche nus geniturs cumenzain a planisar la vita da noss uffants, lura èn tuts involvids baud u tard stressads, surdumandads e frustrads», è Nicolas Zogg persvas.
E quai paran ils babs n'er betg da far, sco ils quatter babs dal podcast conferman. Nagin dad els ha propi in plan per il futur da lur uffants. Il pli impurtant per els è che lur uffants fan insatge che fa plaschair ad els e ch'els èn cuntents, bain cun la resalva ch'els vegnan d'avair ina buna vita.
Babs na sustegnan betg tut
Sch’i va per il futur da lur uffants èn ils babs da principi bain pronts da sustegnair els. E quai schizunt per fitg gronda part, sco ils quatter babs Jan, Curdin, Paul e Marcel conferman per exempel. Resalvas datti dentant bain era tar els. Uschia ch'els n'èn il mument probablamain er betg pronts da propi sustegnair adina tut quai ch'ils uffants vulan eventualmain emprender u far ina giada en lur vita. Betg uschè pronts da sustegnair èn els cunzunt chaussas che èn cunter lur principis, che na paran betg d'avair pes e mauns u chaussas che n'èn finanzialmain betg supportablas respectivamain che n'empermettan betg da pudair star sin atgna chommas .
Betg rumper gronds siemis
Siemis tge far ina giada en la vita han bain tut ils umans anc insanua en els. Sco uffant èn quels siemis dentant bain anc in zic pli genuins e betg anc turbulentas da la realitad. Uschia ch'i na fa betg smirvegliar ch'in uffant u l'auter vul vegnir actura da Hollywood, in chantadur da renum, ina Youtubera cun milliuns da followers u forsa era in profi da ballape che gudogna milliuns.
Per blers geniturs èn quai bain mo siemis d'uffants pauc realistics, dentant il coach da babs, Nicolas Zogg cusseglia da betg vulair rumper quels siemis sco genitur. «Uscheditg che l'uffant na sto betg anc sa decider per daventar per exempel profi u betg, pon ins sco bab bain laschar ad el il siemi.» Da quest avis èn er ils quatter babs Jan, Paul, Curdin e Marcel. Natiralmain èsi er da discurrer per part cun l'uffant per mussar ad el tge che quai vul dir dad ir quella via e tge ch'i dovra tut per pudair vegnir per exempel actura u profi da ballape.
