Avant da pudair dir sch'ins è il bab ch'ins vul esser, ston ins respunder duas dumondas. Per l'ina tge bab ch'ins vul insumma esser. E lasuenter èsi da guardar, tge bab ch'ins è propi.
In maletg d'in bab han bain tut ils babs en els. «Co quel guarda dentant ora, dependa tranter auter da la relaziun cun l'agen bab, d'autras figuras da babs u era dad erox da films», manegia il coach da babs dal Grischun, Nicolas Zogg. Er il maletg d'in bab ch'ins na vul betg esser è in aspect ch'influenzescha quest maletg dal bab. Uschia possian ins per exempel dir: «Hei na, uschia ina relaziun sco mes bab ha gì cun mai, na vul jau betg avair cun mes uffants.»
Propi clers e concret n'è quai maletg dal bab ch'ins ha en ins per il pli dentant betg. «Ed il privel è ch'ins cumenza a surelevar quel maletg diffus cun las pli differentas chaussas ch'ins vul anc agiunscher a quel maletg grond», di Nicolas Zogg. Era na fetschian ins betg la cumprova, sche quai tut saja lura era realisabel. Perquai po el be cussegliar da far baud avunda quellas dumondas per pudair contrahar las cundiziuns ch'ins dovra per pudair esser il bab ch'ins vul er esser – pia ch'ins vegn per exempel era da lavurar dapli a temp parzial, sch'il desideri è d'avair dapli temp cun l'uffant ed ina relaziun pli stretga cun el.
Babs lavuran cunzunt a temp cumplain
La plipart dals babs en Svizra ha anc adina in pensum cumplain. Tenor l'Uffizi federal da statistica han il 2022 bun 80% dals babs cun partenaria e l'uffant giuven sut 13 onns lavurà cumplain (90-100%). Be 2% dals babs han gì in pensum da sut 50%. Ed insumma betg lavurà han sulet in zic dapli che 6% dals babs cun partenaria ed uffants sut 13 onns.
En egl dat che questa cumpart da babs che na lavuran betg, s'augmenta para adina pli fitg cun la vegliadetgna da l'uffant. Uschia han il 2022 passa 16% dals babs cun l'uffant giuven tranter 18 e 24 onns betg lavurà. Era l'uffant giuven tranter 0 e 3 onns eran quai be 6% dals babs. Per cumparegliar: Il 2010 eran quai be anc 12% dals babs che na lavuravan betg sche l'uffant giuven era tranter 18 e 24 onns. E tar famiglias cun l'uffant giuven tranter 0 e 3 onns è la cumpart dals babs restada tuttina en tut quels onns.
Remartgabel è plinavant che la cumpart da babs cun in pensum cumplain sa reducescha para pir cura che l'uffant giuven è maioren. Uschia han tenor las cifras da l'Uffizi federal da statisicta il 2022 anc 80% dals babs lavurà cumplainamain, sche l'uffant giuven era sut 18 onns. Era l'uffant giuven dentant tranter 18 e 24 onns eran quai be pli anc 73%.
Adina dapli er a temp parzial
En general pon ins dir che babs lavuran ozendi en congual cun il 2010 in zic pli pauc cun in pensum cumplain e pli savens parzial. Uschia lavuravan il 2010 anc prest 87% dals babs cun partenaria e l'uffant giuven sut 13 onns cun in pensum cumplain. Parzialmain lavuravan lura pir 7% dals babs ch'avevan l'uffant giuven sut 13 onns. Il 2022 eran quai gia passa 13% dals babs.
En egl dat plinavant era ch'ils babs lavuran il pli savens cun ina cumpart parziala cura ch'ils uffants èn anc fitg pitschens. La pli auta cumpart da babs che lavuran parzialmain è cura che l'uffant giuven en famiglia è tranter 0 e 3 onns. Quella è cun 15% dals babs anc pli auta che cura che l'uffant è gia maioren (11%).
Il pli derasà è ch'omadus lavuran
Ch'il bab lavura cun in pensum cumplain e la mamma be cun in pensum parzial è il model il pli derasà en Svizra. Pertge savens reducescha la dunna ses pensum da lavur u desista schizunt temporarmain cumplainamain sin ina lavur da gudogn, sch'in pèr sa decida da fundar ina famiglia e survegn uffants. Pli vegls ch'ils uffants èn dentant e pli savens che las mammas lavuran puspè e quai cunzunt lura cun in pensum cumplain u in parzial da passa 50%.
Be paucs tegnairchasas da pèrs sa decidan per in model, nua che omadus lavuran parzial. Il pli savens è quest model da chattar tar famiglias, nua che l'uffant giuven è sut 4 onns. Che l'um na lavura betg u be parzialmain è in model ch'i dat be tar ina fitg pintga part dals tegnairchasas en Svizra. Da chattar è quest model cunzunt en tegnairchasas senza uffants.
En egl dat en pli ch'il model classic/tradiziunal, nua che l'um lavura cun in pensum cumplain e la dunna insumma betg n'è betg uschè fitg derasà sco eventualmain pensà. La prozentuala da quest model variescha tranter las differentas categorias da vegliadetgna da l'uffant giuven dad 11 fin 15%. La cumpart da quest model è sa reducida dapi il 2010 cuntinuadamain.
Grischuns èn pli tradiziunals
In zic auter para quai dad esser en il Grischun. Il model classic/tradiziunal è anc da chattar tar in quart da tut quels tegnairchasas cun uffants sut 13 onns. Cun bun in terz (32%) da quels tegnairchasas è dentant il model, nua che l'um lavura cun in pensum cumplain e la dunna cun in pensum parzial da pli pauc che 50%, il model il pli derasà en il Grischun. Betg bler sut la media svizra para il model da famiglia d'esser, nua che omadus partenaris lavuran cun in pensum cumplain. Tenor las cifras da l'Uffizi federal da statistica vegn quest model pratitgà da stgars 13% dals tegnairchasas en il Grischun, nua che l'uffant giuven è sut 13 onns.
Il tegnairchasa è cunzunt chaussa da la mamma
Cuschinar, lavar giu, cumprar en, far urden, lavar resti, far ora cun il fier u era tgirar ils uffants cun far pensums, far termagls u accumpagnar e far transport vegnan en Svizra anc adina fatg il pli savens da las mammas. Quai mussan per exempel las cifras actualas da l’Uffizi federal da statistica dal 2018 fitg cler.
Tar bun 62% da tut ils tegnairchasas da pèrs cun uffants fan cunzunt las dunnas il perchasa. Che quellas lavurs da chasa vegnan fatgas cunzunt dad umens è l’excepziun cun gist 6% dals tegnairchasas da pèrs.
Nova generaziun da babs?
Pli giuvens ch’ils uffants èn e pli savens ch’il perchasa vegn fatg d'omadus tuttina bler. Dentant era qua è la pli auta cumpart gist tar 30%. E quai en tegnairchasas, nua che l’uffant pli giuven è tranter 0 e 3 onns. Dentant era qua vegn en prest dus da trais tegnairchasas il perchasa fatg cunzunt da la dunna.
En egl dat era sch'i va per il temp ch'ils umens inpundan en il tegnairchasa. Umens en in tegnairchasa cun l’uffant giuven sut 15 onns, han tenor l'Uffizi federala da statiscitca impundì 5,2 uras dapli per emna per las lavurs da chasa e famiglia il 2020 che quai ch’els faschevan anc il 2010. Independent da quest augment da temp dals babs, impundan las mammas en in tegnairchasa cun l’uffant giuven sut 15 onns anc adina prest il dubel uschè bleras uras per las lavurs da chasa, e bun la mesadad uschè bleras uras en la tgira d’uffants che lur partenaris.
Laschar far insatgi auter il perchasa n’è betg propi ina opziun per ils tegnairchasas da pèrs en Svizra. En tut ils tegnairchasas da pèrs en Svizra vegn quai be fatg tar 0,5%.
