Podcast: Babs ticcan auter - Sun jau in bun bab u betg?

Inqual bab ha en ses mintgadi bain mintgatant il sentiment da betg adina esser gist il meglier bab per ses uffants. Uschia per exempel sch'el turna adina puspè memia tard da la lavur a chasa, sch'el è stedi pli fatschentà cun ses telefonin che cun ses uffants, sch'el va pli gugent a far sport empè da dar in gieu cun els, sch'el percorscha ch'el n'è betg stà in bun exempel per els en tschertas situaziuns, ch'el n'è betg qua per sustegnair e gidar els u er sch'el perda ina u l'autra giada la gnerva e vegn lura er pli dad aut cun ils uffants che quai ch'el vul en sasez.

Ed igl èn cunzunt quels muments e questas situaziuns che laschan dumandar els, sch’els fan er propi tut endretg per lur uffant, tge ch'els pudessan far meglier u almain auter e sch’els èn la fin finala er buns babs, uschia sco els èn. Insatge ch’era ils quatter babs Curdin, Jan, Paul e Marcel enconuschan or da lur mintgadi.

Ils babs dal podcast

Episoda 1: Sun jau in bun bab?

Da principi gea. Mintgatant en tschertas situaziuns forsa betg adina gist il meglier bab, dentant segir betg in schlet. Quai è il facit dals quatter babs suenter ch'els èn vegnids confruntads en l'emprima episoda da «Babs ticcan auter» cun la dumonda sch'els n'èn betg mo gugent, mabain la fin finala er buns babs.

Daco e pertge ch'els han quest sentiment, quant savens ch'els fan insumma quella dumonda ed insumma co igl è d'esser bab dad in u dus uffants ch'èn tranter dus e tredesch onns, raquintan ils quatter babs en l'emprima episoda dal podcast.

Episoda 2: Tge è in bun bab?

Bun u betg è savens er ina dumonda da l'optica. Uschia vesa forsa in bab quai ch'in auter bab fa, sco insatge che n'è betg ideal per l'uffant, fertant che quel è cumplainamain da l'avis d'esser in bun bab cun ses agir. Opiniuns tge ch'in bun bab è, pon uschia tut tenor persuna er variar.

Tge qualitads che defineschan in bun bab è en prima lingia ina dumonda, tge che nus sco societad ed er nus sco individi spetgain d'in bab. Ina clera e simpla resposta n'è perquai betg adina uschè simpel da dar. Cun empruvar da sentir in zic ord ils pli differents mediums tge che la societad spetga d'in bun bab, cun dumandar tant ils babs sezs sco er ils uffants co els defineschan in bun bab, e cun guardar tge ch'experts din e co il stan da la scienza è, duai ina resposta a questa dumonda cumplexa dentant vegnir in zic pli palpabla.

Episoda 3: Tge è in schlet bab?

Il sentiment da betg adina esser il meglier bab e da betg adina far tut endretg cun ils uffants è in sentiment ch’era ils babs Paul, Jan, Curdin e Marcel han mintgatant. Sa sentir dentant sco in schlet bab, na sa sentan els tuttavia betg. Ina definiziun d’in schlet bab è perquai era betg uschè greva per els. Or da lur respostas resultan ils suandants puncts che caracteriseschan tenor els in schlet bab:

• N’ha betg peda ed interess per l’uffant e na s'occupa perquai insumma betg cun el, uschia che l’uffant vul era savair nagut pli dal bab.
• N’è strusch u insumma betg a chasa, na mira betg per la famiglia e na vegn er betg da bajegiar si ina relaziun cun l’uffant.
• N’ha betg gugent ses uffant.
• Dat sin l’uffant, vegn grop e memia savens, memia dad aut cun el

Bain in bun punct da partenza. Dentant sche questa definiziun resta er uschia suenter aviar discurrì cun divers experts? Sch'i dat la fin finala uschia in mussavia per esser in bun bab? E sche babs ch'èn violents cun lur uffants èn propi era schlets babs? Tut questas dumondas vegnan tematisadas en la terza episoda dal podcast.

Episoda 4: Pli blers uffants e pli grev ch'igl è?

Mintga buna relaziun dovra temp ch’ins impunda. Quai n’è betg bler auter sch’ins vul sco bab avair ina tala cun ses uffant. Cun mintga uffant che vegn vitiers po quai dentant bain vegnir pli grev, damai ch’il temp ch’ins ha a disposiziun per mintga singul uffant sa reducescha bain era qua tras.

Da betg avair avunda temps per mintg’uffant e da vegnir confruntà uschia er cun ranfatschas da betg tractar tuts tuttina, schabegia probablamain pli savens a geniturs, pli blers uffants ch’els han.

Lingera e stadera per la pasch

Probablamain hai er gia dà babs ch’han per exempel gia prendì ina lingera ed ina stadaira vi da meisa per mesirar e pasar giu tut exact avant da mangiar. Uschia èsi stà per tuts vi da maisa cler che mintgin survegn tuttina bler, quai ch’ha spargnà blera gnerva per discussiuns invanas tgi ch’ha survegnì dapli e daco.

Sa referind sin quests trais puncts, pia da betg adina avair peda per tut ses uffants, da mintgatant era betg tractar tuts tuttina, u da betg vegnir d’organisar tut sco quai ch’i tutga, pon ins en in prim pass bain concluder ch’igl è schont pli grev d’ademplir quellas spetgas ch’ins ha sez d’esser in bun bab, pli blers uffants ch’ins ha.

Daplirs gidan da vegnir or dal focus

Dentant i dat bain er tschella vista. Numnadamain quella ch’igl è vegnì per part pli simpel cun pli blers uffants. Pertge sch'uffants han fragliuns, lura fan els era pli bler in cun l'auter. Ils geniturs na stattan uschia betg pli en il center da tut ed han perquai era dapli temp per autras chaussas.

Gea, co è quai lura sco bab da plirs uffants? E co vegn el d’ademplir sias spetgas ch’el ha d’in bab, per pudair esser quel bun bab? Dumondas che quella quarta episoda emprova da respunder.