L'EHC Arosa dastga uss tuttina far il pass en la segund auta liga da hockey svizra. La licenza, ed uschia la porta per sa participar a la Swiss League la stagiun 2025/2026 è s'averta. La federaziun svizra da hockey, Swiss Ice Hockey ha numnadamain dà raschun ad in recurs dal club grischun. Uschia daventa la Swiss League pli attractiva cun duas equipas grischunas – quai che munta era plirs derbys grischuns.
Procedura difficila fin a la licenza
La fin favrer aveva l'EHC Arosa communitgà da betg dastgar far il pass en la Swiss League. La cumissiun da licenza da la Federaziun da hockey svizra haja refusà la candidatura per motivs formals. Sco quai che l'EHC Arosa ha scrit, hajan els gì temp fin il glindesdi saira, ils 24 da favrer, d'acceptar ina cunvegna da promoziun. Il club vuleva dentant anc sclerir in punct: el vuleva avair l'approvaziun da pudair far tranter Nadal e Bumaun il gieu da hockey tradiziunal encunter in club da la liga naziunala – l'uschenumnà «Arosa Ice Classic». Pir sut lezza cundiziun vulevan ils d'Arosa suttascriver la cunvegna.
Ins n'haja tenor l'EHC Arosa dentant mai survegnì ina resposta da la liga. La liga ha perencunter taxà la dumonda d'Arosa sco «betg inoltrada». Quai saja in agir «nunflexibel», han ils responsabels dal EHC Arosa sinaquai crititgà.
Forsa tuttina anc avert ina pitschna porta?
Silsuenter ha era la Federaziun da hockey svizra prendì posiziun: Da principi fissan tut ils criteris stads ademplids per survegnir ina licenza per la Swiss League. Che l'EHC Arosa insistia da vulair manar atras l'«Arosa Ice Classic» saja dentant pir vegnì enconuschent il glindesdi a la cumissiun da licenzas. Ina promoziun na dastgia betg esser colliada cun cundiziuns supplementaras che n'eran ditg betg enconuschentas. Plinavant na possia in budget en la Swiss League betg sa basar sin entradas d'in singul event sco l'«Arosa Ice Classic». La basa economica stoppia esser dada davent dal cumenzament.
