Gieu da legendas ad Arosa - EHC Arosa festivescha 100avel anniversari cun gieu da legendas

Gia 100 onns exista l'EHC Arosa. L’equipa ch’era ina pussanza en il hockey naziunal ils onns tschuncanta lascha reviver sia istorgia. En quest connex datti in gieu da legendas. In'equipa dad «Old stars and legends» dat in gieu encunter legendas dal EHC Arosa. Patrick Fischer, Mathias Seger, Marcel Jenni e Reto von Arx cunter Guido Lindemann, Reto Dekumbis, Beni Neininger e blers auters.

Arosa, in pitschen lieu cun ina gronda istorgia

Cun 9 titels da campiun svizzer tutga il EHC Arosa anc adina tranter las meglras equipas da hockey en Svizra. Ils 7 titels da campiun svizzer en seria ils onns tschuncanta èn anc adina record. Ed ils duels il principi dals onns otganta cun il Club da hockey da Tavau legendars: EHC Arosa campiun svizzer ils onns 1980 e 1982 – Tavau campiun ils onns 1984 e 1985. Quai era il temp glorius dal hockey grischun, nua che gist duas equipas tutgavan tar las pli fermas da l’entir pajais.

Suenter ha il EHC Arosa stuì sa retrair da la liga naziunala A l'onn 1986. Dapi lura n'è l’equipa mai pli turnada en la pli auta liga da hockey svizra. La magia e l’aura dals onns otganta èn dentant anc adina in zichel qua. La magia vegn segiramain a reviver durant il gieu da legendas, nua ch'i vegn al duel tranter legendas dal hockey svizzer cun legendas dad Arosa.

Gieu da legendas ad Arosa

 Gieu da legendas a favur da la partiziun da juniors

Il gieu da legendas è naschi avant in per onns da l’idea d'in gieu da cumià. Las legendas da hockey ch’eran lura da la partida han vulì repeter questa aventura, uschia ch'ulteriurs gieus da legendas èn suandads. Davent da l’entschatta era l’idea da l’iniziant Daniel Pita da dar la pussaivladad a giugaders dad equipas engiadinaisas da pudair giugar ina giada cunter legendas da hockey. Or da questa idea è sa sviluppada l’idea dal gieu da legendas, ch’è uss set onns suenter sia premiera creschida ad ina gronda festa da hockey.