Finì cun gieus da test e gieus amicabels. Davent dad uss quinta mintga gol e mintga punct. Sin quest mument han l’EHC Arosa e ses fans spetgà vess. En vista a la stagiun 2024/2025 ha l’equipa da tradiziun dal Scanvetg fatg bleras midadas. Sulet quatter giugaders da tschep da la stagiun passada èn anc da la partida, 17 novs èn vegnids vitiers, per gronda part giugaders giuvens.
Il sulet che fa mal in zic il venter al trenader Rolf Schrepfer che trenescha l’EHC Arosa dapi la stagiun 2020/21 è il fatg che plirs giugaders èn il mument blessadas. Ed Arosa, propi in club en la periferia, n’ha betg in cader lartg. Schrepfer spera uschia da survegnir sustegn dal EHC Cuira suenter ch’ins è sa cunvegnids da collavurar ensemen pli stretg en l’avegnir cun il club da chapitala che dat da nov en la Swiss League. Uschia na datti la proxima stagiun er betg pli ils derbis grischuns tranter Cuira ed Arosa.
Uss cumenza tut puspè tar nulla
L’EHC Arosa è dentant pront per la nova stagiun. Durant la stad ha l’equipa pudì trenar bain e mussar divers buns gieus da test. Sulet ils davos dus gieus encunter Cuira ed encunter l’EV Lindau Islanders, in’equipa che dat en l’Oberliga da la Germania, han ils d’Arosa pers. La finamira saja da cuntanscher ils playoffs en questa stagiun, di Rolf Schrepfer, e silsuenter saja tut pussibel. En mintga cas vul l’equipa fa in pass pli lunsch che la stagiun passada. Suenter ins stupenta qualificaziun è la stagiun stada a fin gia suenter il quartfinal. En quel è l’equipa dal Scanvetg vegnida franada suenter in crimi encunter l’EHC Seewen.
L’EHC Arosa, che festivescha quest onn il giubileum da 100 onns, cumenza la stagiun 2024/2025 la sonda saira a las 20:00 uras cun in gieu da chasa encunter Hockey Huttwil.
