Il 1986 è il club da hockey d'Arosa sa retratg da la liga naziunala A, quai per motivs economics. Dapi lura è il club dal Scanvetg ina squadra d'amaturs. Actualmain dat in'equipa en la terz'auta liga svizra, la MyHockey League. Dapi onns ha il club da tradiziun dentant adina puspè la finamira da turnar en il hockey professiunal. Per motivs finanzials u er per motivs sportivs n'hai dentant mai funcziunà.
Uss pudess il siemi ir en vigur
Christian Modes è dapi vaira exact in onn CEO dal club da hockey da tradiziun. Tenor el saja impurtant ch'ins haja finamiras e na stettia betg airi. Il club da hockey d'Arosa ha inoltrà sco unica squadra da la MyHockey League la dumonda d'astgar giugar la proxima stagiun en la Swiss League. Per dumagnar quai sto Arosa vegnir en ils mezfinals dals playoffs, pia gudagnar ina runda da playoff. Actualmain è la giuvna squadra dal Scanvetg da chattar sin plazza tschintg da la tabella. La qualificaziun per ils playoffs è quasi fixa. Igl è damai realistic da dumagnar l'ascensiun sportiva.
Sfida finanziala
Uffizialmain n'ha l'EHC Arosa anc betg communitgà la finamira da promoziun. Quai vegn a succeder en il decurs da quest'emna. Tuttina ha il portal d'infurmaziuns Watson rapportà gia avant intgins dis davart la finamira dal club. Ina finamira ch'il CEO Christian Modes ha confermà ad RTR.
La gronda sfida per laschar daventar realitad la promoziun èn ils daners. Per esser cumpetitiv en la Swiss League dovra il club in budget da circa 2 milliuns francs. Actualmain ha il club in budget annual dad 800'000 francs. Pia 1 milliun francs dapli dovra l'EHC Arosa. Quai saja ina «lavur da Hercules», sco Christian Modes di. Perquai speria el era sin fans u fatschentas da la Bassa. Sumegliant al HC Tavau ha er Arosa in grond dumber da fans en la Bassa. «Igl è da dar gas per vegnir tar quels daners.»
Nus stuain communitgar a moda agressiva e dar gas per vegnir tar ils daners.
L'EHC Arosa è in club da tradiziun, cun 9 titels da campiun svizzer ed in club cun fans per l'entira Svizra. E sch'i va tenor Christian Modes, lura duai questa giada propi gartegiar da turnar suenter bunamain 40 onns en il hockey sin glatsch professiunal.
