Per ils fans da ballape en Surselva porscha il final da la Cuppa grischuna 2025 ina affischa speziala cun il duel tranter l'equipa da l'US Schluein Glion ed il CB Lumnezia. Per ils Lumnezians èsi l'emprima giada insumma ch'els sa qualifitgeschan per il final. Il final è il di d'Ascensiun, ils 29 da matg a Cuira. RTR emetta il final sco livestream.
CB Lumnezia scriva istorgia
Ils Lumnezians cuntanschan per l‘emprima giada il final da la Cuppa grischuna da ballape. Il CB Lumnezia che dat a la testa da la 4. liga ha gudagnà ordaifer il mezfinal encunter il CB Trun/Rabius cun 3:1. Igl è ina victoria meritada. L‘equipa da la Cadi n‘ha mai propi chattà en il gieu ed ha strusch creà schanzas da gol. En la 25avla minuta ha Mauro Demont sajettà il 1:0 per Lumnezia entras in culp liber ord ina distanza da bun 17 meters. Suenter pausa, en la 54avla minuta, ha l‘emprim Mathias Alig tutgà al 2:0 entras in penalti ed Andriu Alig ha lura fatg tut cler cun ses 3:0 bun 10 minutas avant la fin dal gieu.
En il temp supplementar e cun la davosa acziun dal gieu è il sulet gol per Trun/Rabius crudà, igl è stà in autogol ch'ha sulettamain midà in zic cosmetica vid il resultat. Per Trun/Rabius, che manchenta uschia da vegnir per la segunda giada en roda en il final da la Cuppa grischuna, èsi in‘ulteriura dira frida. Gia en il campiunadi ha l‘equipa da Claudio Bundi pers ils emprims trais gieus da la runda da primavaira ed è uschia ruschnada sut il stritg. Tut auter la situaziun dals Lumnezians ch‘èn sin ina vaira unda da success. Els han bunas schanzas da dumagnar la promoziun en 3. liga e plinavant da cumbatter senza squitsch per il buccal da la Cuppa grischuna. Er encunter l‘US Schluein Glion n‘èn ils Lumnezians numnadamain betg ils favurits.
Victoria meritada per Schluein Glion
Persvas dal tuttafatg n'ha l'US Schluein Glion betg en il mezfinal encunter il FC Landquart. Tuttina ha l'equipa dal trenader Mirco Zala battì Landquart a chasa cun 2:1 e quai meritadamain. Spezialmain avant pausa ha l'equipa da la Foppa gì dapli dal gieu ed ha gì pliras chaschuns da manar pli aut. Oravant tut cun ballas autas sin ils sperts attatgaders è l'USSI vegnida malsegira. Il topscorer Lars Caduff è dentant il sulet giugader ch'ha tutgà la noda avant pausa cun in ferm sajet ad aut ord curta distanza en la 27avla minuta. Curt avant pausa ha Landquart gì ina gronda schanza d'egualisar, els han dentant mo tutgà la petga ord curta distanza.
La segunda mesadad ha cumenzà optimal per l'equipa da Schluein Glion. Remy Manetsch ha sajettà en la 57avla minuta il 2:0 suenter ina bella staffetta da pass. La reacziun da Landquart è dentant vegnida immediatamain. Cun in corner direct han els scursanì en la 61avla minuta. Durant las ultimas 30 minutas ha Landquart bain empruvà anc ina giada tut, malsegir avant gol èsi però mo stà darar, uschia che Schluein è vegnì da tegnair il 2:1 senza pli gronds problems.