- Suenter questa trumpada n’ha Nino Schurter dentant betg laschar pender il chau. Bun in mais pli tard ha el fatg revanscha. En la Val di Sole en l’Italia è Schurter daventà per la 9avla giada campiun mundial ed ha uschia fatg taschair tut quels che avevan gia scrit giu in dals gronds campiuns da mountainbike insumma.
- Cun il tricot da campiun mundial è Nino Schurter ì in’emna suenter ses triumf a Val di Sole a Lai a la partenza cun la finamira da gudagnar sia 33avla cursa da la cuppa mundiala per uschia egualisar il record da la legenda franzosa Julien Absalon. Schurter è dentant vegnì segund davos il Franzos Victor Koretzky uschia ch’el sto avair vinavant pazienza.
- Malgrà ses 35 onns n’ha il mountainbiker oriund da Tersnaus anc betg avunda. El cuntinuescha sia carriera e prenda schizunt en mira ils proxims gieus olimpics il 2024 a Paris. I fissan suenter Beijing 2008 (bronz), Londra 2012 (argient), Rio 2016 (aur) e Tokio 2021 (tgirom) ses tschintgavels gieus olimpics da stad.