En absenza dal campiun olimpic, il Brit Tom Pidcock e l’Ollandais Mathieu van der Poel, han ils Svizzers sco spetgà demonstrà lur classa en la disciplina cross country. Gia en l’emprima runda ha Nino Schurter auzà la cadenza e dictà il tempo. Sin las davosas rundas ha sulet Mathias Flückiger pudì tegnair pitg cun il Grischun da 35 onns. Ils dus Svizzers han dominà la cursa e lavurà fitg bain ensemen. Grazia ad in grondius manever en ina da las davosas stortas ha Schurter pudì surpassar Flückiger. En il sprint final ha il mountainbiker oriund da Tersnaus battì il Bernais per duas secundas.
Per Nino Schurter èsi gia il 9avel titel da campiun mundial tar l’elita da cross country. Tranter il 2015 ed il 2019 aveva el schizunt triumfà tschintg giadas en seria. Flückiger da l’auter maun para d’avair abunà il segund plaz. Trais giadas en seria è uss daventà vice-campiun mundial. Plinavant ha el er gudagnà argient als gieus olimpics a Tokyo. Là aveva Schurter sco quart manchentà be per pauc ina medaglia.
Cumplettà il podest sco terz ed uschia gudagnà bronz a Val di Sole ha il Franzos Victor Koretzky. El ha dentant gia pers 1:08 minutas sin il duo svizzer. Ina buna prestaziun ha er Filippo Colombo mussà. Il Tessinais è vegnì 9avel cun in retard da 2:31 minuta. Cun Marcel Guerrini e Lars Forster han anc dus ulteriurs svizzers cuntanschì in plaz sut ils top 15, Guerrini è vegnì 13avel e Forster 14avel.
En in’emna suonda gia il proxim punct culminant per ils Svizzers. A Lai spetga la proxima cursa da la cuppa mundiala. Nino Schurter dastga uschia parter a sia cursa da chasa sco campiun mundial.
