En la quarta da set rundas ha il Brit surpiglià il timun da la cursa e davent da lura extendì pass per pass ses avantatg sin Mathias Flückiger. Il Svizzer ch'aveva ambiziuns sin la medaglia d'aur sto sa cuntentar cun la medaglia d'argient.
Nino Schurter ha l'entschatta da la cursa anc pudì suenter, pli tard lura stuì suttacumber al tempo dal duo Pidcock e Flückiger. Ditg è el stà en in cumbat per la medaglia da bronz, la finala vegn Schurter quart e manchenta in'ulteriura medaglia a gieus olimpics, quai per be 8 secundas. Bronz va al Spagnol David Valero Serrano.
Il decurs da la cursa:
- Mathieu van der Poel cupitga fermamain en l'emprima runda. El perda bunamain ina minuta.
- Suenter ina runda maina Schurter avant Flückiger.
- En la segunda runda ha Flückiger surpiglià l'emprim plaz, Schurter sin posiziun dus.
- Ils dus Svizzers barattan la lavur da commando.
- En la terza runda ha il Brit Thomas Pidcock surpiglià l'emprima posiziun, avant Schurter.
- Flückiger sin posiziun quatter davos Cooper da la Nova Zelanda.
- Runda 4: Thomas Pidcock surpiglia il timun e maina cun pitschen avantatg avant Flückiger, Schurter sin posiziun quatter.
- Van der Poel ha dà si la cursa en la tschintgavla runda, la cupitgada ha frenà sias ambiziuns da medaglia.
- Ultima runda: Pidcock po distanziar Flückiger e charrescha envers aur olimpic, cun in retard dad ina minuta cumbatta in trio cun Schurter per la medaglia da bronz.
38 ciclists ord 29 naziuns han cumbattì per medaglias. Il traject che vala sco in dals megliers dal mund è ordaifer Tokio ed avess da correspunder a las abilitads da Schurter&Co. La cursa è ida sur 7 rundas à 3,85 km.
Ina valitaziun da noss reporter da sport:
Avant la cursa
A campiunadis mundials ha Mathias Flückiger gia gudagnà intginas medaglias, per aur n'hai anc mai tanschì. Er dals gieus olimpics da stad en la Brasilia il 2016 è el turnà «be» cun in diplom (plazza 6). Quest onn ha Flückiger grondas ambiziuns. El vul gudagnar ina medaglia, sche pussaivel quella dad aur. Po el ademplir las spetgas en sa sez u è il squitsch memia grond?
Per Nino Schurter èn ils gieus a Tokio gia ses quarts gieus olimpics. Il Grischun posseda in'entir set da medaglias olimpicas. Ina quarta medaglia fiss perquai in bel supplement.
La fevra crescha er tar noss reporter da sport Andreas Wieland. Ella rapporta live en il radio RTR da la cursa da Cross Country dals gieus olimpics.
Noss publicum è stà optimistic
77% da las persunas ch'èn sa participadas a noss'enquista han quintà che Nino Schurter fetschia danovamain ina medaglia olimpica.
