Nino Schurter ha manchentà be per pauc sia 33avla victoria en la cuppa mundiala dal mountainbike ed uschia dad egualisar il record dal Franzos Julien Absalon. Il campiun mundial è vegnì segund a sia cursa da chasa a Lai, quai davos il Franzos Victor Koretzky ch'ha procurà per la decisiun avant radund 9'000 fans pir sin il davos kilometer.
A Schurter han mancà duas secundas per triumfar a Lai. Cumplettà il podest sco terz ha Mathias Flückiger, in ulteriur Svizzer. Grazia a quest resultat è il Bernais sin buna via da gudagnar il classament general da la cuppa mundiala en questa stagiun. En duas emnas a la davosa cursa da la cuppa mundiala a Snowshoe en ils Stadis Unids survegn Flückiger la schanza da far tut cler.
Ina buna prestaziun ha er mussà Vital Albin. Il giuven da Tersnaus è vegnì 25avel. Andrin Beeli da Sagogn ha terminà sia carriera da cross country cun in 62avel plaz a Lai. Ursin Spescha da Sevgein è vegnì 82avel.
