Suenter blers onns absenza da la tribuna professiunala da hockey è l'EHC Cuira enavos en las ligas grondas. Ils da Cuira han cunquai puspè marcà preschientscha sin la charta svizra da hockey. En la chapitala grischuna duai puspè reger questa fevra da hockey ch’ins enconuscha anc dals onns enturn la midada dal millenni, cura che l'EHC Cuira ha dà la davosa giada en la liga naziunala A.
Suenter onns turbulents regia puspè euforia a Cuira
Ils davos dus decennis ha l'EHC Cuira gì onns turbulents. Il 2002 ha il club bandunà la liga naziunala A. Paucs onns pli tard ha el lura annunzià concurs ed entras quai fatg voluntarmain il pass en las ligas pli bassas ed uschia en il hockey d’amaturs. Avant bun 10 onns èn ils responsabels dal club anc ina giada vegnids da salvar l'EHC Cuira ch’era sin buna via d'ir bancrut.
Ils davos onns èsi percunter puspè ì ensi cun Cuira. La stagiun passada ha l’equipa – che vegn trenada dapi quatter onns dals dus frars Jan e Reto von Arx – gudagnà il campiunadi en la MyHockey League, la terz ferma liga en Svizra.
Grazia a quest success ha l'EHC Cuira pudì far il pass en la Swiss League, pli baud la liga naziunala B.
Ils da Cuira èn pronts per la nova sfida
En la Swiss League buffa in auter vent. Tut è pli professiunal, tut pli spert, pli tecnic, pli dir, pli tactic. Tenor il scheftrenader Reto von Arx saja l'EHC Cuira però pront per questa sfida. Trenaders e giugaders èn en mintga cas da buna speranza ch’i vegnan da tegnair pitg a la concurrenza. La finamira saja da cuntanscher ils playoffs, schegea ch’ins vegnia a mirar da gieu tar gieu, declara Reto von Arx.
En vista a questa stagiun èn era vegnidas midadas in zic las structuras. Igl è vegnì engaschà persunal qualifitgà e cunzunt era vegnì rinforzà l’equipa cun in u l’auter giugader. Cun Jannik Canova ha il club pudì realisar in transfer da siemi. Per Canova – che duai surpigliar ina rolla da leader – èsi in return tar ses club da chasa. L’attatgader da 23 onns ha gia sco junior giugà per Cuira, lura dentant midà gia baud tar il HCD. Canova n’ha però mai propi pudì sa metter atras ed uschia è el adina puspè vegnì emprestà a clubs en ligas pli bassas. La davosa stagiun ha Jannik Canova dà cun Visp en la Swiss League. El è pia in da quels che sa tge che spetga Cuira en questa liga.
Plinavant ha il club er engaschà cun l’anteriur skiunz Carlo Janka e Michi Bont duas persunas ch’èn cunzunt responsablas per ils trenaments da cundiziun. Cun il rival – l'EHC Arosa – èn ils da Cuira sa cunvegnids da collavurar pli stretg en l’avegnir. Quai èn tut signals che Cuira ha fatg il pass en la Swiss League per restar là, pia restar en l’avegnir en quest hockey professiunal.
Winterthur e Sierre – las emprimas nuschs diras
La stagiun 2024/2025 en la Swiss League cumenza per l'EHC Cuira il venderdi saira, ils 13 da settember, cun in gieu ordaifer cunter l'EHC Winterthur. Gia la sonda, ils 14 da settember, spetga l’emprim gieu da chasa – quai cunter il HC Sierre. Ils ulteriurs adversaris èn l'EHC Basilea, l'EHC Olten, ils GCK Lions, il HC La Chaux-de-Fonds, il HC Thurgau, l'EHC Visp ed ils GDT Bellinzona Snakes.
Qua la survista dals gieus en la Swiss League:
