Il club da hockey da Cuira ha mess la basa per ses futur en il hockey professiunal en la Swiss League.
- L'EHC Cuira è da nov ina societad d'aczias – l'EHC Cuira SA è vegnida fundada ils 24 da matg 2024
- L'EHC Cuira va ina nova via – quella d'in Start-Up
- Duo da trenaders: sco fin qua cun Reto von Arx e Jan von Arx
- Segnà aczias han tranter auter: Carmine Di Nardo, Björn Gerhard, Steffi Buchli e differents hockeyans activs ed anteriurs sco: Enzo Corvi, Leonardo Genoni, Nino Niederreiter, Raeto Raffainer, Reto e Jan von Arx
Sco quai che l'EHC Cuira scriva en ina communicaziun, veglian els recaltgar ils daners per pudair giugar en la Swiss League en moda d'in start-up cun pliras rundas da chapital durant ils proxims sis fin 18 mais. Tenor il president da l'EHC Cuira Carmine Di Nardo na tradeschia il club però betg quants daners ch'el vegnia da recaltgar, uschia Di Nardo envers il schurnal regiunal da SRF. Els veglian però be dar ora quai ch'els hajan era a disposiziun. L'idea da lavurar sco in start-up duai era gidar l'EHC Cuira da restar sin chommas fermas e saunas a lunga vista. Di Nardo accentuescha entant era ch'els partian ussa pitschen, veglian però crescher svelt.
Stagiun senza sustegn da l'exteriur
Il club da hockey da la chapitala grischuna vul daventar in center per giugaders da hockey giuvens e talentads cun licenza svizra. En quest senn planisescha l'EHC la proxima stagiun probablamain senza giugaders da l'exteriur. Els veglian uschia metter in segn per il hockey svizzer, di Di Nardo. El saja persvas ch'i dettia avunda buns giugaders svizzers uschia ch'els possian teganir pitg en la Swiss League. Ultra da quai vul l'EHC Cuira era porscher schanzas als agens giugaders giuvens. Ils proxims onns vegnian las structuras en la promoziun da la giuventetgna adattadas pass per pass a la visiun dal club da Cuira.
Finamira: playoffs
L'EHC Cuira ha la fin da questa stagiun - il mars passà - fatg il pass en la Swiss League, la segund'auta liga da hockey svizra. Be giugar cun na saja però betg l'idea. La finamira saja schon da cuntanscher ils playoffs ed alura insacura era sa posiziunar tranter ils megliers quatter clubs da la liga. Ussa haja però l'emprim ina giada num far pass per pass e ponderar e reflectar bain mintga pass.
Adattaziuns vi dal stadion
Per che l'EHC Cuira saja pront per la Swiss League adattescha la citad il stadion Thomas Domenig a las pretensiuns da la Federaziun svizra da hockey. Sco quai che la citad da Cuira ha communitgà, haja il cussegl da la citad approvà las midadas vi da l'edifizi. Tranter auter vegnian realisadas la separaziun dals secturs da giasts, entradas separadas e controllas d'entrada tar ils secturs da giasts.
Pervi da questas lavurs dat il club da hockey da Cuira ses gieus da preparaziun en la halla da glatsch da trenament.
Or da l'archiv:
