L'EHC Arosa na dastgia betg far il pass en la Swiss League. Tenor ina communicaziun ch'il club da hockey ha tramess il mardi, haja la cumissiun da licenza da la Federaziun da hockey svizra refusà la candidatura d'Arosa per motivs formals. Sco quai che l'EHC Arosa scriva, hajan ins gì temp fin il glindesdi saira, ils 24 da favrer, d'acceptar ina cunvegna da promoziun. Il club vuleva dentant anc sclerir in punct: el vuleva avair l'approvaziun ch'i pon far tranter Nadal e Bumaun in gieu da hockey tradiziunal encunter in club da la liga naziunala – l'«Arosa Ice Classic». Pir sut lezza cundiziun vulevan ins suttascriver la cunvegna.
Ins n'haja tenor l'EHC Arosa dentant mai survegnì ina resposta da la liga. La liga ha perencunter taxà la dumonda d'Arosa sco «betg inoltrada». Quai saja in agir «nunflexibel», han ils responsabels dal EHC Arosa crititgà.
Forsa tuttina anc avert ina pitschna porta?
Da fertant ha era la Federaziun da hockey svizra prendì posiziun: Da principi fissan tut ils criteris stads avant maun per survegnir ina licenza per la Swiss League. Che l'EHC Arosa insistia da vulair manar atras l'«Arosa Ice Classic» saja dentant pir vegnì enconuschent il glindesdi a la cumissiun da licenzas. Ina promoziun na dastgia betg esser colliada cun cundiziuns supplementaras che n'eran ditg betg enconuschentas. Plinavant na possia in budget en la Swiss League betg sa basar sin entradas d'in singul event sco l'«Arosa Ice Classic». La basa economica stoppia esser dada davent dal cumenzament.
Il club da hockey d'Arosa cumbatta vinavant per ina eventuala promoziun en la SwissLeague. El ha inoltrà in recurs perquai ch'el n'ha betg survegnì la licenza per la segund auta liga svizra. L'instanza da recurs da la Swiss League ha uss d'examinar, schebain ins po entrar en il recurs e schebain la licenza po vegnir dada.