Cunquai che la citad da Cuira vul stritgar ses sustegn finanzial per il Big Air a partir dal 2026 vegni difficil per l'occurenza. Sco il manader da l'organisaziun René Götz ha ditg envers RTR na vegn l'occurenza sco ella è actualmain betg pli ad esser pussaivel. Quai funcziunia be sche la citad, il chantun ed ils partenadis subvenziuneschian l'occurrenza.
Ediziun custa 4,5 milliuns francs ad onn
L'eveniment sportiv ensemen cun ils concerts custia mintg'onn enturn 4,5 milliuns francs. Ils gronds custs sco la tribuna e la schanza èn tant sco fixs. Spargnar possian ins be tar piculezzas tschà e là, uschia ha ditg il president dal comité dal Big Air Victor Zindel envers RTR. Tar duas da las trais ediziuns dal Big Air avev'ins pudì scriver cifras nairas, ma il 2022 hai dà in minus d'in mez milliun francs, cunquai ch'i han gì memia paucs visitaders e visitadras. Ed er quest onn quintan ins cun in deficit.
Sco il president da la citad da Cuira, Urs Marti ha ditg envers RTR è oriundamain be stà previs ina finanziaziun da partenza e che l'occurenza vegnia suenter a pudair sa finanziar sezza. Dentant entras la cumplexitad da l'eveniment cun construir ina schanza sco er porscher concerts, saja ina finaziaziun statala necessaria. Uss stoppian ins guardar sch'ins chatta ulteriurs sponsurs che contribueschan a l'eveniment. Sch'i vegn en l'avegnir anc a dar il Big Air a Cuira, saja perquai anc avert.
Citad da Cuira sto spargnar
La citad da Cuira ha elavurà in pachet da mesiras da spargn per las investiziuns dals proxims onns. La raschun è che las investiziuns planisadas sajan memia autas, cumpareglià cun il gudogn che vegn a resultar. Sco la citad scriva, duain las mesiras segirar in quint equilibrà ils proxims onns.
Crair vidlonder sto tranter auter il Big Air, là vul la citad reducir mintg'onn las contribuziuns.
